არ მგონია, სრულად მაჟორიტარულ სისტემას ბიძინა ივანიშვილმა მხარი დაუჭიროს , – ამის შესახებ საპარლამენტო უმრავლესობის წევრმა, სიმონ ნოზაძემ განაცხადა. მისი თქმით, სრულად მაჟორიტარული სისტემის ნაკლი ის არის, რომ არ მოხდება ახალგაზრდა პოლიტიკოსების აღზრდა.
„ეს უპერსპექტივო საქმედ მიმაჩნია, რადგან საკონსტიტუციო უმრავლესობას ვერ დააგროვებენ. არ მგონია, სრულად მაჟორიტარულ სისტემას ბიძინა ივანიშვილმა მხარი დაუჭიროს“, – განაცხადა სიმონ ნოზაძემ.
პარტია „ქართული ოცნების“ ოფისში უმრავლესობის შეხვედრა მიმდინარეობს. სხდომაზე განსახილველი ერთ-ერთი საკითხი ე.წ. ამერიკულ საარჩევნო მოდელთან დაკავშირებით მაჟორიტარი დეპუტატების ნაწილის ინიციატივა. 11 მაჟორიტარი, რომლებმაც პროპორციულ საარჩევნო სისტემაზე გადასვლას მხარი არ დაუჭირეს, ახლა შერეული სისტემის გაუქმებასა და 2020 წლის შემდეგ სრულად მაჟორიტარული სისტემის ამოქმედებას ითხოვენ. უმრავლესობის ლიდერები კანონპროექტს ეწინააღმდეგებიან და დარწმუნებული არიან, რომ ინიციატორები მის დამტკიცებას ვერ შეძლებენ. ავტორები კი ხელმოწერების შეგროვებას იწყებენ. 10 მაჟორიტარის მიერ ინიცირებულ კანონპროექტს 113-ი დეპუტატის ხმა ესაჭიროება.
იდეის ერთ-ერთი ავტორის, გურამ მაჭარაშვილის განცხადებით, მათ მიერ მომზადებული კანონპროექტი ამერიკული მოდელია, რომელიც ქვეყანაში სტაბილურობას უზრუნველყოფს. პროექტის მიხედვით, პარლამენტი ორპალატიანი გახდება, რომელიც მაჟორიტარული პრინციპით აირჩევა.