ბათუმის ბულვარი საახალწლოდ სხვადასხვა სახის მანათობელ კონსტრუქციასა და აქსესუარს ყიდულობს. ბულვარმა ლამპების, სანათების და ნაძვის ხის ნათურების შესაძენად ტენდერი უკვე გამოაცხადა, - აღნიშნულის შესახებ ინფორმაციას აჭარის საზოგადოებრივი მაუწყებელი ავრცელებს.
ბათუმის ბულვარის ადმინისტრაცია მზადაა კომპანიას, რომელიც საშობაო ირმებს, დეკორატიულ ანგელოზებს, დეკორატიულ ვარსკვლავებს, დელფინებს, გირლეანდებს, მანათობელ ბაფთებს და ნაძვის ხის ლითონის კონსტრუქციის ბაქანს შესთავაზებს, 352 972.00 ლარი გადაუხადოს.
ბათუმის ბულვარში ამბობენ, რომ ვინაიდან წელს ქალაქის მთავარი ნაძვის ხე ბულვარში განთავსდება და მთავარი ლოკაციაც იქ იქნება, განათებების დამატება გახდა საჭირო. გასულ წლებში მხოლოდ ბულვარის ცენტრალური შესასვლელის მორთვა ხდებოდა.
ახალი დეკორატიული განათებები ძირითადად შუა არეალში განთავსდება.
"ბულვარში ასეთი გრანდიოზული სამზადისი პირველადაა. რადგან ადრე ევროპის მოედანზე იმართებოდა ძირითადი ღონისძიებები და ნაძვის ხეც იქ იდგმებოდა, წელს კი ბათუმის ბულვარში გადმოინაცვლა, ამიტომაც საჭირო გახდა განათებების დამატება. ჩვენ ამ კუთხით მერიას ვეხმარებით. იქნება ძალიან ლამაზი სანახაობა, საჩუქრის ფორმის სანათებით შეიფუთება 25 დეკორატიული ბუჩქი"-ამბობენ ბათუმის ბულვარში.