მთავრობამ უცხოურ ვალუტაში დაკრედიტებაზე ზღვარი შესაძლოა არ ჩამოწიოს. როგორც დღეს მთავრობის სხდომის დასრულების შემდეგ ფინანსთა მინისტრმა განაცხადა, უცხოურ ვალუტაში დაკრედიტებაზე 200 ათას ლარიანი ზღვარის დაწესება თავის დროზე, იპოთეკური სესხის ამღებთა დასაცავად იქნა შემოღებული და მაშინ ამას თავისი მიზანშეწონილობა ჰქონდა. ივანე მაჭავარიანის თქმით, ამ დროისათვუს სამინისტრო 200 ათას ლარიანი ზღვარის 100 ლარამდე შესაძლო შემცირების საკითხს აანალიზებს.
„200 ათას ლარიანი ზღვარის შემოღების ლოგიკა და მიზანშეწონილობა იყო, რადგან ძალიან დიდია იპოთეკური სესხის ამღები ფიზიკური პირების რაოდენობა. ამ ზღვარში ექცეოდა ყველაზე გაყიდვადი ბინები, შესაბამისად, მიჩნეულ იქნა, რომ ეს ადამიანები არიან ყველაზე მოწყვლადი, როდესაც კურსი მერყეობს. ამის დასაცავად იყო გაკეთებული“, – განმარტა მინისტრმა.
თუმცა, მაჭავარიანის განმარტებით, ახლა იკვეთება მეორე საკითხი, რომელიც მშენებლობის სფეროში ბიზნესაქტივობას უკავშირდება.
„ახლა არის მეორე არგუმენტი – მეტი ბიზნესაქტივობა შევიტანოთ ამ სფეროში, რომელიც ვფიქრობ, მშენებლობის სექტორში, ბოლო რამდენიმე თვეა, საკმაოდ წამოწეულია. ამ ორ საკითხს შორის არის გადაწყვეტილება. დოლარის დაკრედიტებას რომ მიეცეს გასაქანი, შესაძლოა, ცოტა მეტი სტიმული მიეცეს დარგს, თუმცა რასაკვირველია, მნიშვნელოვანია მსესხებელთა საკითხი, რომელიც კრედიტს აიღებენ დოლარში. როგორც წესი, იპოთეკური სესხი მრავალწლიანია, 2022-2023 თუ 2027, ისევ დოლარზე ახდენს ზეწოლას და ამ ორს შორის არის დილემა. შესაბამისად, აღნიშნულის ანალიზი მიმდინარეობს. შევხედავთ, შესაძლოა, ზღვარი არ ჩამოვწიოთ. ჩვენ დაგვევალა ანალიზი და არ გამოვრიცხავ, რომ დავტოვოთ ეს ზღვარი. თუმცა ჯერ ორივე ვარიანტი დევს მაგიდაზე და მივიღებთ გადაწყვეტილებას, რომელიც საუკეთესო იქნება ქვეყნისთვის“, – განაცხადა ივანე მაჭავარიანმა.
