,,პატივცემულო მმართველი პარტიის ლიდერებო! უკვე 30 წელია, გვაქვს ასეთი საარჩევნო სისტემა და სწორედ ამიტომ ტრიალებს ქვეყანა მოჯადოებულ წრეზე და ამიტომ ვერ დავიწყეთ ამ მოჯადოებული წრის გარღვევა. ამის შესაძლებლობას კი იძლევა სწორედ პროპორციული საარჩევნო სისტემა. რომ ახალი სისხლი შემოვიდეს ქართულ პოლიტიკაში, გაჯანსაღდეს პოლიტიკური ველი და ერთხელ და სამუდამოდ რეალურად ასახოს პარლამენტმა ქართველი ამომრჩევლის, საქართველოს მოქალაქეების ნება და არა რაიმე სხვა ინტერესი. დღევანდელი ოპოზიცია არის მრავალფეროვანი, განსხვავებული წარსულითა და განსხვავებული მომავლის ხედვით, მაგრამ ერთიანი იმაში, რომ მომავალი საპარლამენტო არჩევნები უნდა ჩატარდეს ახალი სამართლიანი საარჩევნო სისტემით. ამასთან, ის პროტესტი, რომელსაც ჩვენ ვხედავთ რუსთაველზე, არ არის მხოლოდ ოპოზიციური პარტიების პროტესტი. ამის დასტურია წლევანდელი ზაფხული, ამის დასტური იყო გუშინდელი დღე, როდესაც რუსთაველზე იდგა ქართული საზოგადოების ძალიან ფართო წარმომადგენლობა და სხვადასხვა ჯგუფი.
ლელო - პოლიტიკური მოძრაობა, საზოგადოებრივი გაერთიანება დგას იქ, სადაც დგას ქართული საზოგადოება. ჩვენ ვდგავართ რუსათველზე, ვიდგებით ყველგან და შევუერთდებით ყველა პროტესტს, რომელიც იქნება სამართლიანი, სადაც იქნება ქართული საზოგადოება, სადაც იქნებიან ქართველი ახალგაზრდები. სწორედ ის ახალგაზრდები, რომელთა პრინციპულმა , თანმიმდევრულმა და თავდადებულმა ბრძოლამ გააჩინა ზაფხულში შესაძლებლობა, რომ პოლიტიკური პროცესები წარმართულიყო სამართლიანად და სტაბილურად. თქვენ დღეს გინდათ, რომ ეს შესაძლებლობა მოკლათ. ჩვენ ამ ახალგაზრდებთან ვდგავართ და დავრჩებით მათთან ერთად. აქ დგას მთელი ქართული სახელმწიფოს ინტერესი.
მოვუწოდებთ საქართველოს ხელისუფლებას - არავითარ შემთხვევაში არ გამოიყენოს ძალა დემონსტრანტების წინააღმდეგ! აქ არ არის საუბარი სამართლებრივ გამოსავლებზე. შექმნილია პოლიტიკური კრიზისი და თქვენ გევალებათ, მოძებნოთ პოლიტიკური გამოსავალი ამ კრიზისიდან, რომელიც თქვენვე შექმენით - თქვენი უსინდისო, უტიფარი მოქმედებებით.
მოგიწოდებთ, იაზროვნოთ და მოიქცეთ სახელმწიფოებრივი ინტერესებიდან გამომდინარე. ნუ ჩაუდგებით ჯიბრში ქართულ საზოგადოებას, საქართველოს მოქალაქეებს და ქვეყნის ინტერესებს. ყველანაირი პასუხისმგებლობა განვითარებულ მოვლენებზე დაგეკისრებათ თქვენ!'' - განაცხადა ანა ნაცვლიშვილმა.