ზუგდიდში მცხოვრებ ფრანგული ენის პედაგოგს მედიკო ჭაჭუას საფრანგეთის ეროვნული განათლებისა და ახალგაზრდობის სამინისტრო "აკადემიური პალმის ორდენს" - Palmes académiques გადასცემს. ამის შესახებ სოციალურ ქსელში წერს ზუგდიდის განათლების რესურსცენტრის ხელმძღვანელი კახა ფარცვანია.
მისი ინფორმაციით, მედიკო ჭაჭუა აღნიშნულ ჯილოდზე საქართველოს ფრანგულმა ინსტიტუტმა წარადგინა.
"მედიკო ჭაჭუა, ეს სახელი და გვარი ასოცირდება ფრანგულ ენასთან, ფრანგულ კულტურასთან. ეს არის სახელი და გვარი, რომელიც ყველა ზუგდიდელმა იცის, მედიკოს ყველა იცნობს. დაუფასებელია მედიკოს ღვაწლი თაობების აღზრდაში, მისი მოსწავლეები საფრანგეთის სხვადასხვა ცნობილი უნივერსიტეტების სტუდენტები არიან.
დღეს სასიხარულო ამბავი გავიგეთ! კიდევ ერთხელ დაფასდა მედიკოს შრომა და საფრანგეთის ელჩი საქართველოში, 28 ნოემბერს, ილიას სახელმწიფო უნივერსიტეტში მას გადასცემს საფრანგეთის ეროვნული განათლებისა და ახალგაზრდობის სამინისტროს სახელმწიფო ჯილდოს "აკადემიური პალმის ორდენი" - Palmes académiques", - წერს კახა ფარცვანია.
აკადემიური პალმის ორდენი უძველესი ორდენია საპატიო ლეგიონის ორდენის შემდეგ. იგი დააწესა ნაპოლეონ ბონაპარტემ 1808 წელს. მისი განახლება მოხდა 1955 წელს და მას გადასცემენ როგორც ფრანგ, ისე უცხოელ მოქალაქეებს განათლების სფეროში განსაკუთრებული დამსახურებისა და მსოფლიოში ფრანგული კულტურის აქტიური პოპულარიზაციისათვის.