იაპონიაში, ოკინავას კუნძულზე მდებარე, იუნესკოს მსოფლიო კულტურული მემკვიდრეობის ნუსხაში შეტანილი შურის ციხე-სიმაგრის კომპლექსი ხანძარმა გაანადგურა.
იაპონური მედიის ცნობით, ხანძარი თავდაპირველად ციხე-სიმაგრის მთავარ ნაგებობაში გაჩნდა, რის შემდეგაც გავრცელდა სხვა შენობებზეც.
მეხანძრეები რამდენიმე საათის განმავლობაში ცდილობდნენ ხანძრის ჩაქრობას, რომელიც ამ დროისთვის ლოკალიზებულია.
შურის ციხე-სიმაგრე იაპონიაში რიუკუს დინასტიის ზეობის დროს, მონარქის ერთ-ერთ მთავარ რეზიდენციას წარმოადგენდა.
ციხე-სიმაგრე დაახლოებით 5 საუკუნის წინ აშენდა. მეორე მსოფლიო ომის დროს კომპლექსი ფაქტობრივად მთლიანად განადგურდა. მოგვიანებით, მოხდა მისი მთლიანი რეკონსტრუქცია და რეაბილიტაცია.
შურის ციხე-სიმაგრეს მე-20 საუკუნის 30-იან წლებში იაპონიის ეროვნული საგანძურის სტატუსი მიანიჭეს.