შეერთებული შტატების პრეზიდენტი დონალდ ტრამპი მიკრობლოგ "ტვიტერზე" აქვეყნებს ძაღლის ფოტოს, რომელიც "ისლამური სახელმწიფოს" ლიდერის ლიკვიდაციის ოპერაციაში იღებდა მონაწილეობას.
"გავასაჯაროვეთ ფოტო შესანიშნავი ძაღლისა (სახელს არ ვასაჯაროვებთ), რომელმაც ფასდაუდებელი სამუშაო გასწია „ისლამური სახელმწიფოს“ ლიდერის აბუ ბაქრ ალ-ბაღდადის დაკავებასა და ლიკვიდაციაში", - წერს დონალდ ტრამპი მიკრობლოგ "ტვიტერზე".
პენტაგონის ინფორმაციით, ძაღლმა ოპერაციის მიმდინარეობისას მცირე დაზიანებები მიიღო, თუმცა მას მკურნალობენ და საფრთხე არ ემუქრება.
27 ოქტომბერს, თეთრ სახლში გამართულ საგანგებო ბრიფინგზე, შეერთებული შტატების პრეზიდენტმა დონალდ ტრამპმა განაცხადა, რომ „ისლამური სახელმწიფოს“ ლიდერი, მსოფლიოს ნომერ პირველ ტერორისტად მიჩნეული აბუ-ბაქრ ალ-ბაღდადი ლიკვირებულია.
"ალ ბაღდადი მკვდარია აშშ-ის სპეცოპერაციის შედეგად, სირიის ჩრდილოეთით. არცერთი ამერიკული სამხედრო არ არის დაზარალებული", - განაცხადა ტრამპმა.
მისივე თქმით, ამერიკელი სპეცსამსახურების მიერ წარმოებული ოპერაციის დროს, აბუ-ბაქრ ალ ბაღდადი ეცადა გაქცეულიყო და თავი გვირაბს შეაფარა, სადაც „შაჰიდის ქამრით“ თავი აიფეთქა. მასთან ერთად დაიღუპნენ ალ ბაღდადის მცირეწლოვანი შვილები.
„ის იყო ავადმყოფი და საზიზღარი ადამიანი. ის მოკვდა, როგორც ძაღლი, ის მოკვდა, როგორც მხდალი“, - დასძინა ტრამპმა.
ტრამპის თქმით, გენეტიკურმა ანალიზებმა დაადასტურა, რომ გვამი დანამდვილებით ალი ბაღდადს ეკუთვნოდა.
როგორც აშშ-ის პრეზიდენტმა თქვა, სპეცოპერაციის მიმდინარეობას, თეთრი სახლის სიტუაციური ოთახიდან, თვალყურს ადევნებდა ვიცე-პრეზიდენტსა და თავდაცვის მდივანთან ერთად.
ტრამპის თქმით, გასული ღამე შესანიშნავი იყო, როგორ ამერიკისთვის, ასევე მთელი მსოფლიოსთვის.
მან მადლობა გადაუხადა სპეცოპერაციის მონაწილეებსა და მათ ვინც მხარდაჭერა გაუწია აშშ-ს სპეცსამსახურებს.
დონალდ ტრამპმა დასძინა, რომ დღეიდან, მსოფლიო უფრო უსაფრთხო გახდება.