მიუხედავად, დასავლეთის სახელმწიფოების ლიდერების მოწოდებებისა, ანკარა არ აპირებს სირიის ჩრდილოეთით სამხედრო ოპერაციის წარმოებს შეწყვეტას, სანამ დასახულ მიზნებს არ მივაღწევთ. აცხადებს თურქეთის პრეზიდენტის პრესსპიკერი იბრაჰიმ კალინი.
"ისინი ვინც ჩუმად იყო, როდესაც ათასობით მშვიდობიანი მოქალაქე იღუპებოდა მოსულში, რაქასა და დეირ ეზ-ზორში, ახლა ითხოვენ, რომ შეწყდეს სამხედრო ოპერაცია "მშვიდობის წყარო" და თურქეთს სანქციებით ემუქრებიან. ჩვენ არ გავჩერდებით სანამ ჩვენს მიზნებს არ მივაღწევთ“, - წერს კალინი ტვიტერში.
იბრაჰიმ კალინის თქმით, თურქეთი ებრძვის ტერორისტებს და არა ქურთებსა და მშვიდობიან მოქალაქეებს.
თურქეთმა სამხედრო ოპერაცია "მშვიდობის წყარო" ჩრდილოეთ სირიაში 9 ოქტომბერს დაიწყო.
გერმანიის კანცლერმა ანგელა მერკელმა და საფრანგეთს პრეზიდენტმა ემანუელ მაკრონმა მოუწოდეს თურქეთის პრეზიდენტს, დაუყოვნებლივ შეწყვიტოს სამხედრო ოპერაცია სირიის ჩრდილოეთით, რადგან ეს რეგიონში "გაუსაძლის ჰუმანიტარულ კატასტროფას" გამოიწვევს.
ლიდერების მოწოდებების ფონზე საფრანგეთმა და გერმანიამ თურქეთს იარაღის მიწოდება შეუწყვიტეს.
სამხედრო ოპერაციას კიდევ ერთხელ გამოეხმაურა შეერთებული შტატების პრეზიდენტი დონალდ ტრამპი, რომელმაც მიკრობლოგ "ტვიტერზე" დაწერა, რომ ის და კონგრესი მუშაობენ თურქეთისთვის უმკაცრესი სანქციების დაწესებაზე.
მანამდე ტრამპმა განაცხადა, რომ თუ თურქეთი დასაშვებ ზღვარს გასცდება, აშშ-ი თურქეთის ეკონომიკას გაანადგურებს.
ფოტო: AP