შეერთებული შტატების პრეზიდენტი დონალდ ტრამპი აცხადებს, რომ იგი მუშაობს კონგრესმენებთან ერთად, რომელთა შორის ასევე არიან დემოკრატები, რათა თურქეთს, სირიაში მიმდინარე სამხედრო ოპერაციის ფონზე, სანქციები დაეკისროს.
ამის შესახებ პრეზიდენტმა ტრამპმა მიკრობლოგ "ტვიტერზე" დაწერა.
"მე ვმუშაობ სენატორ ლინდსი გრეჰემთან და კონგრესის სხვა წევრებთან, მათ შორის დემოკრატებთან, რათა დაწესდეს მკაცრი სანქციები თურქეთის წინააღმდეგ. სახაზინო დეპარტამენტი მზად არის საქმეს შეუდგეს, შესაძლოა ახალი კანონის მიღება გახდეს საჭირო. თურქეთი გვთხოვდა, რომ ეს არ გაგვეკეთებინა. ამ საკითხთან დაკავშირებით შესანიშნავი კონსენსუსი არსებობს. დაგველოდეთ", - დაწერა ტრამპმა მიკრობლოგზე.
მანამდე სახაზინო მდივანმა სტივენ მნუჩინმა განაცხადა, რომ მისი უწყება მზადაა, საჭიროების შემთხვევაში, დაუყოვნებლივი სანქციების დაწესებისთვის.
ტრამპის განცხადებამდე, კონგრესსა და სენატში უკვე შეტანილი იყო კანონპროექტები თურქეთისთვის სანქციების დაწესებაზე.