თურქეთის პრეზიდენტმა რეჯებ თაიფ ერდოღანმა გააკრიტიკა ევროკავშირის ქვეყნები, რომლებმაც სირიაში თურქეთის სამხედრო ოპერაცია დაგმეს და მათ სირიელი ლტოლვილებისთვის საზღვრის გახსნით დაემუქრა.
"ჩვენ ტერორისტული საფრთხის ქვეშ ვართ და 3,5 მლნ სირიელი ლტოლვილი გვყავს, რომლებიც სამშობლოში ვერ ბრუნდებიან. მათ, ვისაც არ უნახავთ ქურთთა მუშათა პარტია, გვეუბნებიან, გადექით გვერდზე! დროა, ევროკავშირი გონს მოვიდეს! ევროკავშირში არასდროს ყოფილან გულწრფელები, ისინი ჩვენ გამუდმებით გვატყუებდნენ, თუ გვეტყვიან, რომ ეს ოპერაცია ჩვენი მხრიდან ოკუპაციაა, ლტოლვილებისთვის კარს გავაღებთ", - განაცხადა ერდოღანმა ანკარაში სიტყვით გამოსვლისას.
ამის გარდა მან გააკრიტიკა საუდის არაბეთი და ეგვიპტე, რომლებმაც ასევე დაგმეს თურქეთის სამხედრო ოპერაცია.
"დაე, სარკეში ჩაიხედოს საუდის არაბეთმა. ვინ მიიყვანა იემენი ამ მდგომარეობამდე? ურჩევნიათ ჯერ ამაზე გასცენ პასუხი. როგორ ბედავთ ჩვენთვის რამის თქმას. ეგვიპტეს ურჩევნია, საერთოდ გაჩუმდეს. მას მართავს ადამიანი, რომელმაც თავის ქვეყანაში დემოკრატია მოკლა", - აღნიშნა თურქეთის ლიდერმა.
თურქეთმა სირიის ჩრდილო-აღმოსავლეთით სამხედრო ოპერაცია "მშვიდობის წყარო" 9 ოქტომბერს დაიწყო. ხელისუფლების განცხადებით მისი მიზანია ქურთთა რაზმებისა და "ისლამური სახელმწიფოს" მებრძოლთა განადგურება.
ევროკავშირმა სასტიკად დაგმო თურქეთის ოპერაცია და დაუყოვნებლივ მისი შეწყვეტისკენ მოუწოდა.