პარლამენტის ჯანდაცვის კომიტეტის ხელმძღვანელის, აკაკი ზოიძის განცხადებით, ქრონიკული მედიკამენტების პროგრამა ხარვეზიანია, რადგან გარკვეული დაინტერესების გამო ექიმები პაციენტებს აღნიშნულ პროგრამაში შემავალ მედიკამენტებს არ უწერენ.
ზოიძის თქმით, განიხილება ცვლილებები, რომლის მიხედვითაც სახელმწიფო კონკრეტულ მედიკამენტებს აღარ დააფინანსებს.
„ქრონიკული მედიკამენტების პროგრამა არის ხარვეზიანი პროგრამა და გამოსასწორებელია. იცით, რომ იმ მედიკამნეტს არ უწერენ პაციენტებს, რომელიც დღეს არის ხელმისაწვდომი ამ პროგრამის ფარგლებში, რაღაც სხვა ინტერსების გამო და ა.შ ექიმები მალავენ ინფორმაციას, არასაკმარისად აწვდიან, მოკლედ ბევრი საკითხია. აქ უნდა მოხდეს არა კონკრეტული მედიკამენტის სუბსიდირება, არამედ ჯგუფის მედიკამენტების და მერე იმისდა მიხედვით პაციენტს რომელი ჭირდება და ექიმი რომელს თვლის კონკრეტულად იმ ჯგუფიდან მიზანშეწონილს ამ ადამიანისთვის, მაგის მიხედვით მოხდეს ფასით სუბსიდირება“, - აცხადებს აკაკი ზოიძე.
შეგახსენებთ, ქრონიკული დავადებების სამკურნალო მედიკამენტების სახელმწიფო პროგრამა 2019 წლის ბიუჯეტიდან 20 მლნ ლარით არის დაფინანსებული. პროგრამის ფარგლებში 35-ზე მეტი დასახელების მედიკამენტის შეძენა სოციალურად დაუცველ მოქალაქეებს, პენსიონერებს და შშმ პირებს სიმბოლურ 1 ლარად შეუძლიათ.