- სამართალი 14 სექტემბერი 2019, 17:48
ბედიის მონასტერში X საუკუნის ფრესკები განადგურებულია. მღვდელმსახურება რუსულ ენაზე მიმდინარეობს
ბედიის უნიკალური კომპლექსი განადგურების პირასაა. სოციალურ ქსელში ვრცელდება ვიდეოჩანაწერი, რომელშიც ტაძრის კედლები თითქმის სრულად დაზიანებულია. განადგურებულია მეათე საუკუნის უნიკალური ფრესკები.
ღვთისმშობლისა და სხვა ფრესკებზე იკითხება რუსული წარწერები. აყრილია ტაძრის იატაკი, შენობაში ჩანს ხარაჩოები და მიმდინარეობს არასათანადო მეთოდოლოგიით სარესტავრაციო სამუშაოები.
კულტურული მემკვიდრეობის დაცვის სააგენტოს ხელმძღვანელი "კურიერთან" ინტერვიუში ყველა იმ პრობლემაზე საუბრობს, რომელიც ოკუპირებულ აფხაზეთში, ოჩამჩირიდან 25 კმ-ის დაშორებით მდებარე, ბედიის კომპლექსში არსებობს. როგორც ირკვევა, ჯერ კიდევ გასულ წელს ტაძარში არსებული ბაგრატის ფრესკა სრულად განადგურებული იყო. დღეს, ტაძარში საეკლესიო მღვდელმსახურება რუსულ ენაზე აღევლინება.
ბედიის კომპლექსი X საუკუნის მიწურულს, დაახლოებით 999 წელს ააგო გაერთიანებული საქართველოს პირველმა მეფემ ბაგრატ III ბაგრატიონმა, როგორც საეპისკოპოსო.
ბედიის სამონასტრო კომპლექსი ოჩამჩირიდან 25 კმ-ის დაშორებით მდებარეობს, სოფელ ბედიის ცენტრში. იგი ქართული ხუროთმოძღვრების ულამაზესი ნიმუშია. მასში დღეისთვის ღვთისმშობლის სახელობის ტაძარი, საეპისკოპოსო პალატა და სამრეკლოს ნაწილი შედის.
ბედიის საეპისკოპოსო საუკუნეების განმავლობაში შუა საუკუნეების ერთ-ერთ უმნიშვნელოვანეს საეკლესიო და კულტურულ-საგანმანათლებლო ცენტრს წარმოადგენდა.
დავით აღმაშენებელმა საქართველოსა და ქართული ეკლესიის ერთიანობის სიმბოლოდ ბედიელ მთავარეპისკოპოსს სვიმეონს ბედიელ-ალავერდელის საპატიო წოდება მიანიჭა, რითაც აღმოსავლეთ-ქართული და დასავლეთ-ქართული უძლიერესი სალოცავების ერთიანობას გაუსვა ხაზი.
მთავარეპისკოპოსმა ანტონ ჟუანისძემ ბედიის სამონასტრო კომპლექსში შექმნა წიგნთსაცავი, სადაც მიმდინარეობდა ძველ ხელნაწერთა განახლება-რესტავრაცია, საღვთისმეტყველო წიგნების თარგმნა და წიგნსაცავის შევსება ახალი ხელნაწერებით. ბედიის მონასტერში დასაფლავებულია გაერთიანებული საქართველოს პირველი მეფე ბაგრატ III და დედამისი — დედოფალი გურანდუხტი.
