ოდესიდან ელაპარაკოს ოდესელებს. ის განცხადებები, რომლებსაც აკეთებს, შეინახოს თავისთვის, - ასე უპასუხა საზოგადოება “ლელოს“ დამფუძნებელმა, მამუკა ხაზარაძემ ტელეკომპანია პირველის ეთერიდან საქართველოს ყოფილ პრეზიდენტს მიხეილ სააკაშვილს.
ხაზარაძე სააკაშილს მოუწოდებს, შეეშვას მისთვის შეურაცხყოფის მიყენებას:
"მე ძალიან გულწრფელად მინდა ვუთხრა, რომ პირველ რიგში, მან ტონი და სიტყვათა წყობა შეცვალოს. მე მესმის პოლიტიკა, მე მესმის კონკურენცია, მაგრამ სიტყვათა წყობა და შეურაცხყოფა შეცვალოს, პირველი. მეორე - ადამიანს, რომელსაც ქვეყანა ირჩევს პრეზიდენტად და ადამიანი, რომელიც გაურბის მართლმსაჯულებას და იცვლის პასპორტს, ის ჩემთვის დამთავრებული ამბავია. ამას მთელი სერიოზულობით გეუბნებით. მე ამ ქვეყნიდან 15 წლის წინათაც შემეძლო წასვლა და მაგან რომ სისხლის სამართლის საქმე აღძრა ჩემს წინააღმდეგ, მაგ დროსაც შემეძლო ქვეყნიდან წასვლა. არ წავსულვარ, არ პასპორტი გამომიცვლია და არც ბიზნესი გადამიტანია სხვაგან. თუმცა მე, როგორც ბიზნესმენს, შემეძლო ამის გაკეთება.... ოდესიდან ელაპარაკოს ოდესელებს. ის განცხადებები, რომლებსაც აკეთებს, შეინახოს თავისთვის", - თქვა ხაზარაძემ.
დღეს თიბისი ბანკის დამფუძნებელმა მამუკა ხაზარაძემ საზოგადოებრივი მოძრაობა „ლელო დააფუძნა. მიხეილ სააკაშვილმა მამუკა ხაზარაძის საზოგადოებრივი მოძრაობა ლელოს პრეზენტაციიდან მალევე გამოაქვეყნა ვიდეომიმართვა. „ერთი მევახშე ივანიშვილი არ გვეყო, რომ ახლა კიდევ ვიღაც უფრო წვრილი მევახშეები დაემატოს ერთი მევახშის ბატონობის მერვე წლისთავზე?“, - თქვა სააკაშვილმა.
