თელავის რაიონულმა სასამართლომ „ახალი მემარჯვენეების" მხარდამჭერი კოტე კაპანაძე დამნაშავედ სცნო. მოსამართლე ბესარიონ ტაბაღუამ მთლიანად დააკმაყოფილა კახეთის საოლქო პროკურატურის მოთხოვნა და კაპანაძეს 2 წლითა და 6 თვით თავისუფლების აღკვეთა მიუსაჯა. განაჩენის გამოცხადების მომენტში განსასჯელს ბადრაგის 8 თანამშრომელი, ხოლო მოსამართლეს 9 მანდატური იცავდა.
როგორც "ჯი-ეიჩ-ენს" კახეთის საინფორმაციო ცენტრიდან აცნობეს, სკაპანაძე თავს დამნაშავედ არ სცნობს. მისი ადვოკატები სასამართლოსგან გამამართლებელი განაჩენის დაყენებას მოითხოვდნენ. „ამ საქმეზე სრულიად იქნა იგნორირებული სისხლის სამართლის საპროცესო კოდექსის პრინციპები. ადგილი აქვს პირად ანგარიშსწორებას. კოტე კაპანაძე მხოლოდ იმიტომ მისცეს სისხლის სამართლის პასუხისგებაში, რომ იგი „ახლების" მხარდამჭერია, მისი ძმა კი „ალიანსი საქართველოსთვის" თბილისის ოფისში საქმიანობს", - განაცხადა კოტე კაპანაძის ადვოკატმა კახაბერ ხვისტანმა. მისივე თქმით, დაცვის მხარე თელავის რაიონული სასამართლოს გადაწყვეტილებას თბილისის სააპელაციო სასამართლოში გაასაჩივრებს.
სამართალდამცავებმა კოტე კაპანაძე 2009 წლის 22 ივნისს დააკავეს. კახეთის საოლქო პროკურატურა მას სამსახურებრივი უფლებამოსილების ბოროტად გამოყენებაში ადანაშაულებდა. პროკურატურის ინფორმაციით, კაპანაძემ და თეიმურაზ იარაჯულმა, 2007 წელს, თელავის საგადასახადო ინსპექციაში მუშაობის დროს, არასწორად დაბეგრეს ინდმეწარმე „აიდინ მაილოვი", რითაც სახელმწიფოს 208 ათასი ლარის ოდენობის ზიანი მიაყენეს.
კაპანაძისგან განსხვავებით წარდგენილ ბრალდებაში თავი დამნაშავედ სცნო თეიმურაზ იარაჯულმა. პროკურატურამ მისთვის პირობითის შეფარდება მოითხოვა 2 წლის ვადით, რაც მოსამართლემ დააკმაყოფილა.
თელავის რაიონულ სასამართლოში პროცესს „ახალი მემარჯვენეების" ლიდერები დავით გამყრელიძე და მანანა ნაჭყებია, ასევე ყოფილი სახალხო დამცველი სოზარ სუბარი ესწრებოდნენ. პოლიტიკოსებმა ჯერ კიდევ განაჩენის გამოცხადებამდე აღნიშნეს, რომ სასამართლო, კაპანაძეს, იმ დანაშაულისთვის, რომელიც არ ჩაუდენია, მაინც მკაცრად დასჯიდა.
განაჩენის გამოცხადებისთანავე სასამართლო დარბაზში მსჯავრდებულის დედამ და მეუღლემ გონება დაკარგეს. მიუხედავად იმისა, რომ იატაკზე უგონოდ დავარდნილებს სასწრაფო სამედიცინო დახმარება სჭირდებოდათ, მანდატურები მათ გარეთ ათრევდნენ.
სასამართლო პროცესების მონიტორინგს არასამთავრობო ორგანიზაცია „ადამიანის უფლებათა ცენტრი" ახორციელებდა. უფლებადამცველი ორგანიზაცია დასკვნას უახლოეს დღეებში გამოაქვეყნებს.