პრემიერ-მინისტრობის კანდიდატმა, გიორგი გახარიამ „ქართული ოცნების" დეპუტატების კითხვებს უპასუხა. ერთ-ერთი საკითხი ეხებოდა სიღარიბეს და სახელმწიფოს სოციალურ პასუხისმგებლობას.
„გონივრული ვადა სიღარიბის დაძლევის - ის, რაც ჩვენ პირდაპირ და სიმართლე უნდა ვუთხრათ ჩვენ მოქალაქეებს, რომ ეს შეუძლებელია გაკეთდეს ერთ დღეში, ორ დღეში, ერთ წელიწადში ან ორ წელიწადში. თუმცა, აქვე უნდა ავიღოთ ის ვალდებულება, რომ ჩვენ თუ ამისთვის გვჭირდება რამდენიმე წელი, სოციალური დაცვის მექანიზმები უნდა იყოს უფრო ეფექტური და უფრო მიზნობრივი. ეს ვალდებულება არის სახელმწიფო პირდაპირი პოზიტიური ვალდებულება. ალბათ, ჩვენ შეგვიძლია ვისაუბროთ იმაზე, რომ ის დიდი წვლილი, რაც სოციალური პასუხისმგებლობის ნაწილში სახელმწიფომ უკვე გააკეთა, ალბათ რაღაც გარკვეული აუდიტი ჩასატარებელია, მისი ხარისხის მიზნობრიობის და ეფექტიანობის ნაწილში. თუმცა, რაც ეხება საერთოდ მმართველობის ეფექტურობას - საერთოდ ამ წლების განმავლობაში, ჩვენ იმდენი კარგი, შედეგიანი, მეტ-ნაკლებადაც ახალი ინიციატივა, პროგრამა და კიდევ ბევრი რამ შევთავაზეთ მოსახლეობას და ჩვენს მოქალაქეებს, რომ ალბათ, ეს საკმარისია. რამდენიმე წელი შეიძლება აუცილებელი იყოს მხოლოდ და მხოლოდ ამის იმპლემენტაციას და შესრულებას დავუთმოთ. მე მინდა გითხრათ, რომ ეს მთავრობა იქნება ორიენტირებული სწორედ ამაზე. ეფექტიანობა - ეს იქნება უმნიშვნელოვანესი და პირველი კრიტერიუმი და რა თქმა უნდა, დისციპლინა. კიდევ ერთხელ მინდა გითხრათ, რომ ეფექტური ბიუროკრატიის გარეშე ჩვენ ვერანაირ რეფორმას ვერ მივიყვანთ ლოგიკურ დასასრულამდე. ვერ გავაკეთებთ ისე, რომ ეს რეფორმა გონივრულ ვადაში შეგრძნებადი გახდეს ჩვენი მოქალაქისთვის. ჩვენ ახლა ყველას კარგად გვესმის, რომ ჩვენი მოქალაქისთვის, ქალაქში, სოფელში, სადმე - არა აქვს მნიშვნელობა, ხელისუფლება არის ის ჩინოვნიკი, რომელიც სამწუხაროდ, ხშირად ვერ ახერხებს იმ მოთხოვნილებების დაკმაყოფილებას ელემენტარული, საბაზისო - გზა, წყალი და კიდევ ბევრი რამ. ამიტომ, ერთი რამ უნდა ვთქვათ კიდევ, რომ კონცეპტუალურად სიღარიბის პრობლემის გადაწყვეტა, საბოლოო ჯამში, მაინც მიდის დასაქმებამდე, სამუშაო ადგილებამდე. ახლა ამ მიმართულებით ჩვენ რაღაც პოზიტიური ტენდენცია გვაქვს, სიღარიბის დონე ცოტა იწევს, სამუშაო ადგილები - მაგრამ ეს არ არის დამაკმაყოფილებელი. ტემპები უფრო მეტი გვჭირდება, მაგრამ არის რაღაც ფორმულების დონეზე, კონცეფციაზე უნდა შევთანხმდეთ. ეს კონცეფცია არის მარტივი - ქვეყანას სჭირდება როგორც პოლიტიკური, ასევე, მაკროეკონომიკური სტაბილურობა, ბიზნესგარემო სჭირდება გამჭვირვალე და პროგნოზირებადი, რომ პირველ რიგში ბიზნესმა შექმნას სამუშაო ადგილები, ჩვენ უნდა გვქონდეს ისეთი კომუნიკაცია ბიზნესთან, რომელსაც შეეძლოს პროგნოზის გაკეთება საშუალოვადიან პერსპექტივაში, რათა მან შექმნას საკმარისი ამ ქვეყნისთვის სამუშაო ადგილები. გაძლიერებულ ბიზნესს ჩვენ, სახელმწიფომ, უნდა ველაპარაკოთ სოციალურ პასუხისმგებლობაზე. სანამ ამ ყველაფერს ჩვენ არ გავაკეთებთ, ეს სოციალური პასუხისმგებლობა იქნება სახელმწიფოს ტვირთი და ჩვენ ამის ტარება მოგვიწევს. ეს არის ის წრე, რომელიც გეთანხმებით, რომ ერთ წელიწადში ვერ გავივლით, მაგრამ ეს არის ის რაც ჩვენ უკვე დაწყებული გვაქვს. ერთმნიშვნელოვნად უნდა დავანებოთ თავი ახალ პროგრამებს, ინიციატივებს და კიდევ ბევრ რამეს. უნდა ავიღოთ, გავაკეთოთ აუდიტი, ის რაც უკვე პროგრამისა და ინიციატივის დონეზე გვაქვს გაკეთებული და ეს ყველაფერი უნდა გავიყვანოთ ბოლოში შედეგის სახით. ამის შემდგომ ვაგრძნობინოთ ამომრჩეველსაც, ჩვენსასაც და ჩვენი ოპონენტებისაც, რომ მხოლოდ დაპირება, ლაპარაკი, ინიციატივა - არა. კონკრეტული შედეგი, საქმეც, მაგრამ უკვე კონკრეტული შედეგი. ის შედეგები, რომელიც ჩვენ უნდა გვქონდეს პირველ რიგში უნდა იყოს ხელჩასაჭიდი და მგრძნობიარე მათთვის. ამიტომ, კიდევ ერთხელ ვიტყვი, სამუშაო ადგილები - ეს არის ერთადერთი გზა სიღარიბის დაძლევის, ძლიერი ბიზნესი, რომელმაც ეს სამუშაო ადგილები უნდა შექმნას, შემდგომ ბიზნესის ძლიერი სოციალური პასუხისმგებლობა, მანამდე სოციალური პასუხისმგებლობა, რომელიც სახელმწიფომ უნდა ატაროს. ეს არის ფორმულა და დარწმუნებული ვარ, რომ ეს ის ფორმულაა, რომელიც მისაღებია ყველა ჩვენგანისთვის."- განაცხადა გიორგი გახარიამ.
