"პატრიოტთა ალიანსის" ერთ-ერთი ლიდერი, პარლამენტის წევრი ადა მარშანია საქართველოს პრემიერ-მინისტრობის კანდიდატს გიორგი გახარიას მოუწოდებს, იფიქროს მოსკოვში ვიზიტზე.
აღნიშნული მოწოდებით ადა მარშანია ფრაქცია „პატრიოტთა ალიანსი და სოციალ-დემოკრატების" სხდომაზე გამოვიდა, სადაც გიორგი გახარიასა და მთავრობის შემადგენლობას ხვდებიან.
"კარგია ჟენევის და კარასინი-აბაშიძის ფორმატი, ჩვენ ყოველთვის მხარს ვუჭერდით ხაზგასმით ამ ფორმატებს, მათ თავისი ფუნქცია და შინაარსი გააჩნიათ, მაგრამ ეს არ არის საკმარისი. რატომ ჩავიკეტეთ ამ ორ ფორმატში, რომელიც დარწმუნებული ვარ, არ მოგვიტანს ჩვენ ოდნავ მაინც წინსვლას, იმიტომ რომ დიდი ხანია, ქვეყანა უნდა მოემზადოს სერიოზული და ფართომასშტაბიანი სამუშაოსთვის ამ საკითხში.
ჩვენ გვჭირდება დიალოგი ზუსტად, რომ მოსკოვთან, ზუსტად, რომ კრემლთან და პირდაპირი დიალოგი აფხაზებთან და ოსებთან. პირდაპირი დიალოგი აფხაზებთან და ოსებთან კრემლის, მოსკოვის დახმარების გარეშე, არ გამოვა. ეს არის მწარე რეალობა, რომელშიც კიდევ ერთხელ დავრწმუნდით ჩვენი ვიზიტების დროს მოსკოვში, ამიტომ მოგიწოდებთ, რომ იფიქროთ ამაზე ბატონო გიორგი, ვიზიტებზე მოსკოვში, როგორ უნდა მოხდეს ეს, მომზადება უნდა დავიწყოთ დიდი ხანია, ჩვენ უკვე ვაგვიანებთ ძალიან", - თქვა ადა მარშანიამ.
პარლამენტში საქართველოს მთავრობისთვის ნდობის გამოცხადების საკითხს განიხილავენ.