ჯაკარტა იძირება. დედაქალაქი ყოველ წელს მიწისძვრების, წყალდიდობებისა და მეწყერების ეპიცენტრია.
ინდონეზიის პრეზიდენტის განცხადებით ქვეყნის ახალი დედაქალაქი ბორნეოს კუნძულზე ეკოლოგიურად ყველაზე სუფთა რეგიონში აშენდება. ახალი დედაქალაქის გვერდით კი ეროვნული პარკი იქნება რომელშიც გორილების იშვიათი ჯიში ბინადრობს.
ქვეყნის პრეზიდენტის ჯოკო ვიდოდოს თქმით, სამწლიანმა ინტენსიურმა კვლევამ კუნძულის აღმოსავლეთ ნაწილი, კალიმანტანის პროვინცია დედაქალაქისთვის იდეალურ მდებარეობად მიიჩნია. ექსპერტები აცხადებენ, რომ ახალი დედაქალაქი დაცული იქნება ინტენსიური მიწისძვრებისა და წყალდიდობისგან.
ბორნეოს კუნძული სიდიდით მსოფლიოში მესამეა და ის არის ინდონეზიის არქიპელაგის ცენტრი. დედაქალაქის მშენებლობა 10 წელს გაგრძელდება და სავარაუდო წინასწარი ღირებულება 32 მილიარდი ამერიკული დოლარი იქნება.
პრეზიდენტის განცხადებით, ინვესტიციების მხოლოდ 19 პროცენტი იქნება ბიუჯეტიდან გამოყოფილი. დანარჩენი თანხა ბიზნესიდან და პირდაპირი ინვესტიციებით შეივსება. ქალაქისთვის სახელი ჯერ კიდევ არ შეურჩევიათ.
ამ ეტაპზე ჯაკარტაში 30 მილიონი ადამიანი ცხოვრობს. ის ინდონეზიის ფინანსური ჰაბია, თუმცა მთავრობას ჩაძირვის პირას მყოფი დედაქალაქის გამაგრება ყოველ წელს 6,5 მილიარდი დოლარი უჯდება.