შეერთებული შტატების პრეზიდენტი დონალდ ტრამპი აკრიტიკებს საფრანგეთის პრეზიდენტ ემანუელ მაკრონს ირანისთვის ვაშინგტონთან მოლაპარაკებებთან დაკავშირებით "ურთიერთგამომრიცხავი სიგნალების მიწოდებისთვის". შესაბამისი განცხადება ტრამპმა მიკრობლოგ „ტვიტერზე" გააკეთა.
"ვიცი, რომ მაკრონს კარგი განზრახვა აქვს, მაგრამ აშშ-ის სახელით არავინ უნდა ლაპარაკობდეს თავად აშშ-ის გარდა", - დაწერა ტრამპმა „ტვიტერზე".
შეერთებული შტატების პრეზიდენტმა დასძინა, რომ ირანს დიდი ფინანსური პრობლემები აქვს და სჭირდებათ ვაშინგტონთან მოლაპარაკებები, მაგრამ ურთიერთგამომრიცხავ მესიჯებს იღებენ იმათგან, ვისაც სურს აშშ-ის სახელით ილაპარაკოს.
თეთრი სახლი ჯერჯერობით დუმს თუ კონკრეტულად რის გამო აკრიტიკებს ტრამპი საფრანგეთის პრეზიდენტს.
მანამდე გავრცელდა ინფორმაცია, რომ აგვისტოში საფრანგეთის მასპინძლობით დაგეგმილ „დიდი შვიდეულის" სამიტზე მაკრონმა ირანის პრეზიდენტი ჰასან როჰანი ტრამპთან შესახვედრად მოიწვია. მაკრონის ეს განზრახვა არ დაადასტურა ფრანგულმა მხარემ.