ამერიკის მოქალაქეები, რომელიც გუშინ მაშველებმა გადაარჩინეს საქართველოს ტურიზმის ეროვნული ადმინისტრაციის ხელმძღვანელმა მოინახულა. როგორც მარიამ ქვრივიშვილი აცხადებს, ამერიკელი ტურისტების მდგომარეობა სტაბილურია. მისივე ინფორმაციით, მიუხედავად ინციდენტისა, ტურისტები თუშეთის მონახულებას კვლავ გეგმავენ.
"დღის ბოლოს მოვინახულეთ თუშეთში დაზარალებული ამერიკელი ტურისტები, რომლებიც ვერტმფრენით გადმოაფრინეს ომალოდან. მათ აღნოუჩინეს პირველადი დახმარება და ყველა ტურისტის მდგომარეობა სტაბილურია. ტურისტები კარგად გრძნობენ თავს და სულმოუთქმელად ელიან როდის დაბრუნდებიან და მოინახულებენ თუშეთს კვლავ", წერს მარიამ ქვრივიშვილლი facebook-ის პირად გვერდზე.
შეგახსენებთ, რომ გუშინ, 20 ივლისს, შინაგან საქმეთა სამინისტროს გადაუდებელი დახმარების ოპერატიულ მართვის ცენტრ "112"-ში შემოვიდა ინფორმაცია ახმეტის რაიონის სოფელ ომალოში დაშავებული ტურისტების შესახებ.
დაშავებულების დასახმარებლად დაუყონებლივ გავიდა საგანგებო სიტუაციების მართვის სამსახურის მთავარი სამმართველოს განსაკუთრებულ სიტუაციებზე სწრაფი რეაგირების სამაშველო ჯგუფი.
მაშველებმა ამერიკის ოთხი მოქალაქე, სამი ქალი და 1 მამაკაცი, ვერტმფრენის საშუალებით თბილისში, ღუდუშაურის კლინიკაში გადაიყვანეს.
მათ შორის, ერთ ქალბატონს სხეულის მძიმე დაზიანებები აღენიშნებოდა. მას შესაბამისი მკურნალობა უტარდება. დანარჩენი სამი ტურისტის მდგომარეობა დამაკმაყოფილებელია.
სამაშველო ოპერაციაში ჩართული იყო შინაგან საქმეთა სამინისტროს სასაზღვრო პოლიციის ვერტმფრენი.