"ეკლესიაა გასათავისუფლებელი მოძალადე, ბნელი, ანტიქტისტე რუსის აგენტურისაგან - მათგან, ვინც ავგიას თავლად გადააქცია ღვთის სახლი", - "ევროპული საქართველოს" ერთ-ერთი ლიდერი, გიგი უგულავა გუშინ, მთავრობის კანცელარიასთან განვითარებულ მოვლენებს ეხმიანება.
"უმცირესობის დაცვა ჩვენი ქრისტიანული ვალია. გუშინ უკვე მერამდენედ ვასაძემ & კომპანიამ შეურაცხყვეს იესოს სახელი. გუშინ მთვრალმა მეუფე იაკობმა ამბიონიდან ფეხქვეშ გათელა სიყვარულის მქადაგებელი იესოს სახელი. გუშინ ანდრეა ჯაღმაიძის სახელით ქრისტეს ეკლესიამ იესო უარყო. გუშინ გამოჩნდა, რომ ჩვენ არა მარტო უმცირესობათა უფლებები გვაქვს დასაცავი, არამედ ეკლესიაა გასათავისუფლებელი მოძალადე, ბნელი, ანტიქტისტე რუსის აგენტურისაგან - მათგან, ვინც ავგიას თავლად გადააქცია ღვთის სახლი. დიახ, ეკლესიაში ჩაბუდებულო მოძალადე ფარისევლებო-რომელმან აღიღოს მახვილი, მახვილითვე წარწყმდეს. სახარებით ხელში უმწეო მოქალაქეებს ატერორებთ და ამ სახარების ძალით, არა მარტო იმქვეყნიურ ჯოჯოხეთს მიიღებთ", - წერს უგულავა "ფეისბუკზე".
გუშინ, 14 ივნისს, მთავრობის ადმინისტრაციის შენობასთან, პარალელურად ორი აქცია გაიმართა.
თავდაპირველად, მთავრობის შენობასთან აქცია 19:00 საათზე „თბილისი პრაიდის" ორგანიზატორებმა დაანონსეს, მას შემდეგ რაც საპატრიარქომ 18-23 ივნისს ლგბტ პრაიდის ჩატარებასთან დაკავშირებით განცხადება გაავრცელა და ხელისუფლებას მოუწოდა, არ დაუშვას პრაიდის ჩატარება.
„თბილისი პრაიდის" მიერ დაანონსებული აქციის გამართვამდე, მთავრობის ადმინისტრაციის შენობასთან ბიზნესმენი ლევან ვასაძე, გურამ ფალავანდიშვილი და სასულიერო პირები მივიდნენ, რომლებმაც განაცხადეს, რომ არ დაუშვებენ თბილისში ლგბტ პრაიდის გამართვას.
მოგვიანებით, კონტრაქციის ორგანიზატორებმა მედიასთან განაცხადეს, რომ მათი მიზანი „თბილისი პრაიდის" ორგანიზატორებისთვის ხელის შეშლა იყო. აქციის განმავლობაში კონტრაქციის მონაწილეები შეურაცხყოფას აყენებდნენ პარალელური აქციის მშვიდობიან მონაწილეებს, მათ მხარდამჭერებს, ჟურნალისტებს, ზოგიერთ შემთხვევაში ფიზიკურადაც ეხებოდნენ მათ.
გვიან ღამით, „თბილისი პრაიდის“ ორგანიზატორებმა აქციის დასრულების გადაწყვეტილება მიიღეს.
