საქართველოს საგარეო საქმეთა მინისტრის მოადგილე დავით ჯალაღანია ბულგარეთისა და უნგრეთის რესპუბლიკების საგანგებო და სრულუფლებიან ელჩებს ბრანიმირ რადევსა და გაბორ შაგს შეხვდა.
როგორც "ჯი-ეიჩ-ენს" საგარეო უწყებიდან აცნობეს, შეხვედრისას განხილულ იქნა, შესაბამისად, ბულგარეთის დიპლომატიური ინსტიტუტის მიერ ორგანიზებულ ყოველწლიურ სემინარში ქართველი დიპლომატების მონაწილეობისა და 2 მარტს ბუდაპეშტში დაგეგმილ ვიშეგრადის ჯგუფის ქვეყნების საგარეო საქმეთა მინისტრთა გაფართოებულ შეხვედრაში საქართველოს, როგორც აღმოსავლეთ პარტნიორობის ერთ-ერთი ქვეყნის მონაწილეობის საკითხები. ასევე ორმხრივი ურთიერთობები და მომავალი თანამშრომლობის შესაძლებლობები.
საუბრისას ბულგარეთის მხარემ კვლავ დაადასტურა თავისი მხარდაჭერა საქართველოს ტერიტორიული მთლიანობისა და სუვერენიტეტისადმი და კიდევ ერთხელ გამოხატა მზადყოფნა, ხელი შეუწყოს საქართველოს ევროპულ და ევროატლანტიკურ მისწრაფებებს და ჩვენი ქვეყნისათვის სხვა მნიშვნელოვანი საკითხების გადაწყვეტას.