კონტროლის პალატის 2009 წლის საფინანსო-ეკონომიკური საქმიანობის შემსწავლელ დროებით საპარლამენტო კომისიას უფლებამოსილება კიდევ სამი თვით გაუგრძელდება.
უფლებამოსილების გაგრძელება კომისიის თავმჯდომარემ, დეპუტატმა ბეჟან ბუცხრიკიძემ პარლამენტის დღევანდელ პლენარულ სხდომაზე მოითხოვა.
მისი თქმით, დროებითმა კომისიამ აუდიტის პროგრამის მიხედვით მოითხოვა წლის განმავლობაში პალატის ბიუჯეტში განხორციელებული ცვლილებები, კვარტალური ანგარიშები, სახელმწიფო შესყიდვების შესახებ ინფორმაცია, გაფორმებული ხელშეკრულებები და სხვა მნიშვნელოვანი დოკუმენტაცია, რაც დაკავშირებულია აუდიტთან და როგორც ბუცხრიკიძე აღნიშნავს, კონტროლის პალატის მიერ ამ ეტაპზე მოწოდებული დოკუმენტაციის მოცულობა დაახლოებით 3 ათას გვერდზე მეტს შეადგენს, რომლის დამუშავებაც მიმდინარეობს.
"ზოგიერთი მასალა საჭიოროებს დაზუსტებას და დამატებითი დოკუმნტაციის წარმოდგენას, რაც შესაბამის დროს მოითხოვს", - განმარტა ბუცხრიკიძემ.
მისი თქმით, დროებითი კომისიისთვის მნიშვნელოვანი დოკუმენტია კონტროლის პალატის შიდა აუდიტის დეპარტამენტის დასკვნაც, რაზე მუშაობაც დეპარტამენტს ჯერ არ დაუსრულებია.
შესაბამისად, ბეჟან ბუცხრიკიძემ მისი კომისიის უფლებამოსილების ვადის კიდევ სამი თვით გახანგრძლივება მოითხოვა და პარლამენტის თავმჯოდმარისგან დადებითი პასუხიც მიიღო.
შესაბამის გადაწყვეტილებას პარლამენტი დღის მეორე ნახევარში კენჭისყრით მიიღებს.