კონტროლის პალატის ხელმძღვანელის, ლევან ბეჟაშვილის განცხადებით, მოქალაქეების დაკითხვისას მათი გაშიშვლების ფაქტებს ადგილი არ ჰქონია.
როგორც მან საპარლამენტო კომიტეტის გაერთიანებულ სხდომაზე განაცხადა, მოქალაქეებისგან ახსნა-განმარტების მისაღებად, საჯარო დაწესებულებები განზრახ იქნა შერჩეული და მიზნად სწორედ უსაფრთხოების დაცვას ისახავდა.
ბეჟაშვილის მტკიცებით, გამოკითხვისას მოქალაქეების გაშიშვლების შესახებ გავრცელებული ინფორმაცია გაზვიადებულია. მისი თქმით, გამოკითხვის პროცესს, არც ერთი პოლიციელი არ ესწრებოდა და თითქმის ყველა შემთხვევაში, პროცესზე ადვოკატები იყვნენ წარმოდგენილი.
კონტროლის პალატის ხელმძღვანელის განმარტებით, უსაფრთხოების ზომები დაცვის პოლიციის თანამშრომლების მიერ იყო მიღებული და არა პოლიცილების მხრიდან.
ბეჟაშვილი პარლამენტში დღეს მისი უწყების მიერ განხორციელებული ქმედებების მართლზომიერებაზე ახსნა-განმარტების გასაკეთებლად დაიბარეს.