ირანის სასამართლომ აშშ-ს მოქალაქეს ცენტრალური სადაზვერვო სამმართველოს სასარგებლოდ ჯაშუშობაში ბრალდებულად სცნო და მას სასჯელის უმაღლესი ზომა მიუსაჯა. ინფორმაციას ამის შესახებ "ფრანს პრესი" ირანულ სააგენტო "ფარსზე" დაყრდნობით ავრცელებს.
"ამირი მირზა ხეკმატს, რომელსაც ბრალი ედება მტრული სახელმწიფოს (აშშ) სასარგებლოდ ჯაშუშობაში და ცენტრალურ სადაზვერვო სამმართველოსთან თანამშრომლობაში სიკვდილით დასჯა მიესაჯა", _ იუწყება "ფარსი".
აღსანიშნავია, რომ ირანულ მედიაში 17 დეკემბერს გაჩნდა ინფორმაცია იმის შესახებ, რომ დაკავებულია მამაკაცი, რომელიც ეჭვმიტანილია აშშ-ს სასარგებლოდ ჯაშუშობაში და ასევე იმაში, რომ იგი ცენტრალური სადაზვერვო სამმართველოს აგენტია.
ირანის სპეცსამსახურების ინფორმაციით, ეს ადამიანი ადრე იმყოფებოდა ავღანეთში "ბაგრამის' სამხედრო-საჰაერო ბაზაზე. მასზე თვალთვალი ირანის სპეცსამსახურებმა ჯერ კიდევ ავღანეთის ტერიტორიაზე დაიწყეს, ხოლო მას შემდეგ რაც ამ ადამიანმა ირანის საზღვარი გადაკვეთა, სპეცსამსახურებმა მისი დაპატიმრების შესახებ გადაწყვეტილება მიიღეს.
ამის შემდეგ ირანის სპეცსამსახურებმა გაავრცელეს ვიდეოფირი, რომელზეც დაკავებულმა განაცხადა, რომ იგი აშშ-ში, არიზონას შტატშია დაბადებული.
დაკავებულის მამა, რომელიც პედაგოგად მუშაობს აშშ-ს ქალაქ დეტროიტთან ახლოს თავისი ვაჟის ჯაშუშობას კატეგორიულად უარყოფს და აცხადებს, რომ მისი 28 წლის ვაჟი თეირანში ბებიების მოსანახულებლად გაემგზავრა.