ნორვეგიელ ტერორისტს ანდერს ბრეივიკს, რომელმაც გასული წლის 22 ივნისს ორმაგი ტერაქტი ჩაიდინა და 77 ადამიანი დახოცა, სამშაბათიდან უფლება ექნება წაიკითხოს წერილები, მიიღოს მნახველები და ურთიერთობა ჰქონდეს იმ ჟურნალისტებთან, რომლებმაც მასთან ინტერვიუს ჩაწერის სურვილი გამოთქვეს.
"ორშაბათს იწურება სასამართლოს მიერ ბრეივიკის მიმართ დაწესებული აკრძალვის ვადა, რომლის მოხსნის შემდეგაც, ბრეივიკს საშუალება ექნება პოლიციის ზედამხედველობის ქვეშ ურთიერთიბა ჰქონდეს ნათესავებთან, მეგობრებთან და ჟურნალისტებთან", _ წერს ნორვეგიული გაზეთი "Aftenposten".
"ძალიან ბევრმა ადამიანმა უკვე მიმართა ბრეივიკის ადვოკატებს და მათ მათ კლიენტთან შეხვედრის სურვილი გამოთქვეს. მოთხოვნების ნაწილი უშუალოდ ციხეში და პირადად ბრეივიკსაც გადაეგზავნა", _ აცხადებს ადვოკატი ტურდ იორდენი და აღნიშნავს, რომ ამ ადამიანებს შორის არიან ისეთებიც, რომლებიც ბრეივიკს პირადად იცნობენ და ასევე ისინიც ვინც 22 ივნისამდე მასზე არაფერი იცოდა, თუმცა სხვა და სხვა მიზეზების გამო მასთან შეხვედრა სურთ.
თავად ბრეივიკი, ადვოკატის განცხადებით, ძალიან პოზიტიურადაა განწყობილი იმის მიმართ, რომ მას მნახველები ეყოლება, თუმცა მათ ვისაც არ იცნობს, სთხოვს მასთან შეხვედრის სურვილის მიზეზი განმარტონ.
ანდერს ბრეივიკი ილის ციხის განსაკუთრებით საშიში დამნაშავეების ბლოკში იმყოფება. ამ ადგილზე უსაფრთხოების ყველაზე მაღალი დონეა. ამ ციხის პატიმრებს უფლება აქვთ კვირაში ერთი პაემანი ჰქონდეთ, რა თქმა უნდა პოლიციის მეთვალყურეობის ქვეშ.
ბრეივიკი ასევე ინტერვიუების მიცემას გეგმავს და პირობად აყენებს, რომ მისი ინტერვიუები ცენზურისა და რედაქტირების გარეშე გამოქვეყნდეს.
მასალის გამოყენების პირობები