აზერბაიჯანის ყველა სასაზღვრო-გამშვები პუნქტი თვალსაჩინოების საშუალებებით აღიჭურვება, ამის შესახებ საბაჟოს სახელმწიფო კომიტეტის ხელმძღვანელმა აიდინ ალიევმა განაცხადა. მისი თქმით, ყველა მოქალაქეს პლაკატებისა და პოსტერების მეშვეობით ადგილზე შეეძლება მისთვის საჭირო ინფორმაციის მიღება. საბაჟო გადასახადების გადახდა კი POS-ტერმინალებითა და პლასტიკური ბარათებით განხორციელდება. ალიევმა ასევე განაცხადა, რომ გრძელდება მუშაობა ავტომობილების რეგისტრაციისას "ერთი ფანჯრის" პრინციპის დანერგვის კუთხით. ალიევის განცხადებით, სამუშაოები მაისამდე დასრულდება.
ღონისძიებების ფარგლებში შენდება სახელმწიფო საბაჟო კომიტეტის ავტოსატრანსპორტო საბაჟო სამმართველოს კომპლექსი. ალიევმა აღნიშნა, რომ "ერთი ფანჯრის" პრინციპის დანერგვის შედეგად ავტომობილების რეგისტრაციის პროცესი გამარტივდება.
მისივე თქმით, შემოყვანილ ავტომობილებზე საბაჟო გადსახადებისა და აქციზების შემცირება მოსალოდნელი არ არის. ამის მიზეზად ალიევმა ის ფაქტორი დაასახელა, რომ ქვეყანაში ისედაც დიდი რაოდენობით ავტომობილების იმპორტი ხორციელდება.
