პრაღაში საქართველო-ჩეხეთის სავაჭრო პალატა ოფიციალურად გაიხსნა. პრეზენტაციას საქართველოს ეკონომიკისა და მდგრადი განვითარების მინისტრის პირველი მოადგილე არჩილ კეკელია, ეროვნული საინვესტიციო სააგენტოს დირექტორის მოადგილე ია ჯანაშია და ჩეხეთის რესპუბლიკაში საქართველოს საგანგებო და სრულუფლებიანი ელჩი ნინო ნაკაშიძე დაესწრნენ.
სტუმართა შორის იყვნენ ჩეხური კომპანიების, ბანკების, სამთავრობო უწყებებისა და მასმედიის წარმომადგენლები. არჩილ კეკელიამ სიტყვით გამოსვლისას საქართველოში გატარებული ეკონომიკური რეფორმებისა და ქვეყანაში არსებული საინვესტიციო კლიმატის შესახებ ისაუბრა.
ჩეხეთში ვიზიტისას არჩილ კეკელიამ ჩეხეთის ვაჭრობისა და მრეწველობის მინისტრის მოადგილე მილან ჰოვორკასთან პირისპირ შეხვედრაც გამართა.
შეხვედრაზე საუბარი შეეხო სახელშეკრულებო ბაზის სრულყოფას, ჩეხეთის მხრიდან საექსპერტო დახმარების გაწევის შესაძლებლობას და ქართველი და ჩეხი ბიზნესმენების გაცვლითი ვიზიტების აუცილებლობას. თავად მილან ჰოვორკას ვიზიტი საქართველოში მიმდინარე წლის შემოდგომაზე იგეგმება.