საქართველო შესაძლოა ფრანგული სახელმწიფო სააგენტოების ინტერესის არეალში მოხვდეს. ეკონომიკისა და მდგრადი განვითარების სამინისტროს ინფორმაციით, საფრანგეთში ეკონომიკისა და მდგრადი განვითარების მინისტრის ვერა ქობალიას ოფიციალური ვიზიტისას გაიმართა შეხვედრები საფრანგეთის მთავრობისა და საქმიანი წრეების წარმომადგენლებთან.
გაირკვა, რომ საქართველო აუცილებლად მოხვდება ფრანგული სახელმწიფო სააგენტოების ინტერესის არეალში, რაც ეკონომიკის ცალკეული მიმართულებების მხარდაჭერას ითვალისწინებს. სოფლის მეურნეობა, ტურიზმი, ჰიდროენერგეტიკა, - ეს არის დარგების მცირე ჩამონათვალი, სადაც უახლოეს მომავალში საქართველოსა და საფრანგეთს შორის იგეგმება თანამშრომლობის გაღრმავება.
საფრანგეთში ვიზიტისას, ვერა ქობალიამ შეხვედრები გამართა საფრანგეთის მინისტრთა კაბინეტის ორ მნიშვნელოვან წარმომადგენელთან, მინისტრთან თანამშრომლობის საკითხებში ანრი დე რენკურთან და ეკოლოგიის, მდგრადი განვითარების, ტრანსპორტისა და განსახლების მინისტრთან ნატალი კოსტიუშკო-მორიზესთან. შეხვედრებზე საუბარი წარიმართა ორი ქვეყნის პარტნიორულ ურთიერთობებსა და საერთო პროექტებზე, რომლებიც შესაძლოა განხორციელდეს საქართველოსა და საფრანგეთს შორის.
ეკონომიკის სამინისტროში აცხადებენ, რომ ვერა ქობალიამ შეხვედრები გამართა სადაზღვევო კომპანიაში "COFACE"; საფრანგეთის თანამშრომლობის სააგენტოს ჯგუფში შემავალ კომპანიაში "PROPARCO"; საფრანგეთის საინვესტიციო სააგენტოში, აგრეთვე წამყვანი ფრანგული კომპანიების წარმომადგენლებთან, რომლებიც უკვე ახორციელებენ ბიზნესს საქართველოში, ან განიხილავენ ინვესტირებას საქართველოს ეკონომიკაში. გადაწყდა, რომ საფრანგეთის საქმიანი წრეების წარმომადგენელთა ჯგუფი საქართველოს უკვე მაისში ეწვევა.