ეკონომიკისა და მდგრადი განვითარების სამინისტრომ ე.წ. "არამიანცის" კომპლექსი შემავალი კიდევ 4 საავადმყოფო გაასხვისა.
"გადაუდებელი ნევროლოგიის კლინიკა ნევროლოგის" სახელმწიფო საკუთრებაში არსებული 100%-ი (საწყისი ღირებულება 160 ათასი ლარი) კერძო პირმა, ნოდარ კაკაბაძემ შეიძინა.
"ტრავმატოლოგიისა და ორთოპედიის კლინიკა სინთეზი" (საწყისი ღირებულება 180 ათასი ლარი) 200 ათას ლარად კომპანია "ალსის" წარმომადგენელმა გიორგი ქავთარაძემ იყიდა. მანვე 455 ათას ლარად შეიძინა კომპლექსში შემავალი "ზოგადქირურგიული კლინიკაც" (საწყისი ღირებულება 250 ათასი ლარი).
რაც შეეხება მეოთხე საავადმყოფოს, "ნეიროქირურგიული კლინიკის" ახალი მფლობელი ბიზნესმენი ჯონი გიგანი გახდა. მან ობიექტში, რომლის საწყისი ფასიც ასებე 180 ათასი ლარი იყო, 305 ათას ლარი გადაიხადა.
ეკონომიკისა და მდგრადი განვითარების სამინისტროს ინფორმაციით, "გადაუდებელი ნევროლოგიის კლინიკა ნევროლოგის" საწესდებო კაპიტალი 153361 ლარია და კლინიკას 43068 ლარის დებიტორული და 77107 ლარის კრედიტორული დავალიანება აქვს.
"ტრავმატოლოგიისა და ორთოპედიის კლინიკა სინთეზის" საწესდებო კაპიტალი 122318 ლარს შეადგენს და მას 72894.95 ლარის დებიტორული და 391041.64 ლარის კრედიტორული აქვს. "ნეიროქირურგიული კლინიკის" საწესდებო კაპიტალი 143270 ლარს შეადგენს. აღნიშნულ სამედიცინო დაწესებულებას კი 3720 ლარის დებიტორული და 40689.19 ლარი კრედიტორული აქვს. რაც შეეხება ე. წ. "არამიანცის" კომპლექსში შემავალ "ზოგადქირურგიულ კლინიკას", მას 41605.52 ლარის დებიტორული და 27659.67 ლარის კრედიტორული აქვს. კლინიკის საწესდებო კაპიტალი კი 213558 ლარს შეადგენს.
შეგახსენებთ, რომ ეკონომიკისა და მდგრადი განვითარების სამინისტროს მიერ საპრივატიზაციოდ გამოტანილი, ე. წ. არამიანცის კომპლექსში შემავალი 6 კლინიკის მფლობელი დანიელ გუფთა გახდა. ეკონომიკისა და მდგრადი განვითარების სამინისტროში განმარტავენ, რომ დანიელ გუფთა კომპანია "ამტელ-პროპერტიეს" ერთ-ერთ დირექტორს წარმოადგენს.
გუფთამ ეკონომიკისა და მდგრადი განვითარების სამინისტროსგან 330 ათას ლარად "ზოგადი თერაპიის კლინიკა", 740 ათას ლარად შპს "ძმები ზუბალაშვილების სახელობის პედიატრიული კლინიკა", 500 ათას ლარად შპს "თვალის სნეულებათა კლინიკა მზერა", 720 ათას ლარად "გინეკოლოგიური კლინიკა", 55 ათას ლარად "ანესთეზიოლოგიური კლინიკა" და 2 მლნ. 100 ათას ლარად "თორაკო-აბდომინალური კლინიკის" მფლობელიც გახდა.
იმავდროულად, დანიელ გუფთამ ე. წ. არამიანცის კომპლექსის ტერიტორიაზე მიწის ნაკვეთები შეიძინა.
გუფთამ ე. წ. არამიანცის კომპლექსის ტერიტორიაზე მდებარე 2 მიწის ნაკვეთი, აუქციონის წესით შეიძინა, რომელშიც 1,6 მლნ. ლარი გადაიხადა.
ეკონომიკისა და მდგრადი განვითარების სამინისტროს ინფორმაციით, აუქციონის წესით გაიყიდა თბილისში, წინანდლის ქუჩა №9-ში პირველ სართულზე მდებარე 862,21 კვ.მ. ფართი და მასზე წილობრივად დამაგრებული არასასოფლოსამეურნეო დანიშნულების მიწის ნაკვეთი.
აღნიშნულ ობიექტში დანიელ გუფთამ 1,2 მლნ. ლარი გადაიხადა. დანიელ გუფთამვე შეიძინა ასევე წინანდლის ქუჩა №9-ში მე-2 სართულზე (ლიტერი „ვ") მდებარე 420 კვ.მ. ფართი და მასზე წილობრივად დამაგრებული არასასოფლო-სამეურნეო დანიშნულების მიწის ნაკვეთი, რომელშიც ბიზნესმენმა 400 ათასი ლარი გადაიხადა.