ინდოელი ბიზნესმენები მალე საქართველოს ეწვევიან. ეკონომიკისა და მდგრადი განვითარების სამინისტროს ინფორმაციით, უახლოეს მომავალში საქართველოს ინდოეთის უმსხვილესი ბიზნესგაერთიანების - სავაჭრო და სამრეწველო პალატების ასოციაციის დელეგაცია ეწვევა, რომლის შემადგენლობაშიც წამყვანი ინდური კომპანიების წარმომადგენლები იქნებიან.
ვიზიტის დროს გაგრძელდება საქმიანი დიალოგი საქართველოს მთავრობასა და ინდოეთის ბიზნესწრეებს შორის კონკრეტულ პროექტებთან დაკავშირებით.
ეკონომიკისა და მდგრადი განვითარების მინისტრისა და ფინანსთა მინისტრის ინდოეთში ვიზიტისას ცნობილი გახდა, რომ ინდოელი ბიზნესმენები საქართველოში ინვესტირებით არიან დაინტერესებულნი.
22 თებერვალს ინდოეთის ქალაქ მუმბაიში ფოთის თავისუფალ ინდუსტიულ ზონასთან დაკავშირებით ბიზნესკონფერენცია გაიმართა, რომელსაც ინდოეთის საქმიანი წრეების წარმომადგენლები დაესწრნენ. კონფერენციის ორგანიზატორები იყვნენ კომპანია "რაკია ჯორჯია" და ინდოეთის სავაჭრო და სამრეწველო პალატების ასოციაცია. ინდოელი ბიზნესმენების წინაშე პრეზენტაცია გააკეთეს და შემდეგ შეკითხვებს უპასუხეს ეკონომიკისა და მდგრადი განვითარების მინისტრმა ვერა ქობალიამ და ფინანსთა მინისტრმა კახა ბაინდურაშვილმა.
როგორც კონფერენციაზე ითქვა, ინდოეთის საქმიანი წრეების ინტერესი ფოთის თავისუფალი ინდუსტრიული ზონის მიმართ დიდია. თუმცა ეს ინტერესი მხოლოდ ამ ზონით არ შემოფარგლება. ინდოელი ბიზნესმენები მზად არიან, განიხილონ საქმიანი წინადადებები მრეწველობის, ტურიზმის, ტექსტილის, აგრობიზნესის, უძრავი ქონებისა და ენერგეტიკის სექტორებში კაპიტალის დაბანდებასთან დაკავშირებით.