სოფლის მეურნეობის კორპორაციის მიერ სიმინდის წარმოების ხელშეწყობის ფარგლებში, მაღალხარისხიანი, სერტიფიცირებული სათესლე მასალის დარიგება 1-ლი მარტიდან დაიწყება.
სოფლის მეურნეობის სამინისტროს ინფორმაციით, სიმინდის წარმოების ხელშეწყობის პროგრამა წარმოადგენს სოფლის მეურნეობის სამინისტროს ინიციატივას და მისი მიზანია საქართველოში სიმინდის მოსავლიანობისა და წარმოებული სიმინდის ხარისხის ამაღლება. პროგრამას ახორციელებს სოფლის მეურნეობის კორპორაცია და მის ფარგლებში გათვალისწინებულია ჰიბრიდული ტიპის სიმინდის სათესლე მასალით ფერმერთა უზრუნველყოფა. შემოთავაზებული სათესლე მასალა შემდეგი მახასიათებლების მატარებელია: სათესლე მასალა გამოირჩევა უხვი და სტაბილური მოსავლიანობით, მაღალი რეზისტენტულობით დაავადებათა ფართო სპექტრის მიმართ და მაღალი გვალვაგამძლეობით. პროექტის ფარგლებში წარმოდგენილია სიმინდის თესლის 4 სახეობა.
ტენდერში გამარჯვებული კომპანია Pიონეერ დღეისათვის სიმინდის სათესლე მასალის მსოფლიო ბაზრის 30 %-ს ფლობს და შესაბამისად ამ სექტორში გლობალური ლიდერია. ამჟამად სიმინდის თესლის პირველი ნაწილი უკვე საქართველოშია. სიმინდის სათესლე მასალა დასაწყობებული იქნება აღმოსავლეთ და დასავლეთ საქართველოში. თესლის გაცემა დაიწყება პირველი მარტიდან.
თესლის მისაღებად, აუცილებელია პროგრამაში დარეგისტრირება. დასარეგისტრირებლად, მსურველმა უნდა დარეკოს პროექტის ცხელ ხაზზე (ტელ. +995 32 605 105), მიაკითხოს ადგილობრივ მუნიციპალიტეტს (გამგეობას), ან დარეგისტრირდეს ვებგვერდის მეშვეობით (წწწ.სიმინდი.გე). დარეგისტრირების შემდეგ, თითოეული მსურველი მიიღებს დეტალურ ინფორმაციას პროექტის პირობებისა და სიახლეების შესახებ.
ერთ ჰექტარზე მეტი ფართობისთვის სათესლე მასალის გაცემისას, აუცილებელია სადაზღვევო ან საბანკო საგარანტიო წერილის წარმოდგენა. საგარანტიო წერილის მიღება შეიძლება ნებისმიერ ბანკსა და წამყვან სადაზღვევო კომპანიებში.
სიმინდის წარმოების ხელშეწყობის პროგრამაში, დღევანდელი მონაცემებით, დარეგისტრირებულია 15500-ზე მეტი ადამიანი, რაც მათ მიერ 20 000 ჰექტრამდე ფართობის ათვისებას თვალისწინებს. რეგისტრაციის პროცესი გაგრძელდება აგროვადების დაცვით.
შეგახსენებთ, რომ სოფლის მეურნეობის კორპორაცია არის პროექტების მართვის კომპანია, რომელიც ფოკუსირებულია აგროსექტორზე და მიზნად ისახავს სექტორის სხვადასხვა მიმართულების წარმოების და მართვის ოპტიმიზაციას. კორპორაცია დაარსდა 2010 წელს და არის 100 %-ით სახელმწიფო მფლობელობაში მყოფი ორგანიზაცია. მიუხედავად მოკლევადიანი გამოცდილებისა, კორპორაციამ წარმატებით განახორციელა საქართველოს სოფლის მეურნეობის სექტორის ერთ-ერთი ყველაზე პრიორიტეტული პროექტი - ხორბლის წარმოების ხელშეწყობის პროგრამა, რომელიც ფოკუსირებული იყო ხორბლის წარმოების მოტივაციის შექმნასა და ხორბლის მოსავლიანობის ზრდაზე ქვეყნის მასშტაბით. პროექტი წარმოადგენდა სოფლის მეურნეობის სამინისტროს ინიციატივას.
სექტორისთვის პრიორიტეტული პროექტების გარდა, სოფლის მეურნეობის კორპორაცია ფოკუსირდება უცხოური და ადგილობრივი ინვესტიციების სოფლის მეურნეობის სექტორში მოზიდვასა და პოტენციური ინვესტორების კონსულტაციაზე, იმისთვის, რომ მათ განახორციელონ მიზანმიმართული კაპიტალდაბანდება: მიმართულებებში, რომლებიც პრიორიტეტულია ქვეყნისთვის; პროექტებში, რომლებიც ყველაზე მომგებიანია საზოგადოებისთვის; პროექტებში, რომლებსაც გააჩნიათ მოგების ყველაზე დიდი პოტენციალი. პროექტების განხორციელების გარდა, სოფლის მეურნეობის კორპორაციის მფლობელობაში იმყოფება სამი შვილობილი კომპანია (2 ღვინის კომპანია და შპს. "მექანიზატორი", რომელსაც აქვს 5 სერვისცენტრი საქართველოს სხვადასხვა რეგიონში), რომელთა მართვის ოპტიმიზაცია კორპორაციის მნიშვნელოვანი ამოცანაა. დღევანდელი მდგომარეობით, კორპორაციის წმინდა აქტივების მოცულობა წარმოადგენს 33 488 333 აშშ დოლარს.