პროკურატურის თანამშრომლებმა დიდი ოდენობით სახელმწიფო თანხების მითვისების ბრალდებით ჯანდაცვის სამინისტროს სოციალური მომსახურების სააგენტოს მაღალჩინოსნები და საქართველოში მოქმედი სადაზღვევო კომპანიების სახელმწიფო პროგრამების მენეჯერები დააკავეს.
როგორც პროკურატურაში რამდენიმე წუთის გამართულ საგანგებო ბრიფინგზე აღინიშნა, დაკავებულები არიან სოციალური მომსახურების სააგენტოს 7 თანამშრომელი და კომპანიების: "ალფას", "არქიმედეს გლობალ ჯორჯიას", "ალდაგი ბი სი აის", "იმედი L"-ის, "ირაოს", "აისი ჯგუფის" და "ჯი პი აი ჰოლდინგის" სახელმწიფო პროგრამების მენეჯერები.
"აღნიშნულმა პირებმა ყალბი საბუთების გამოყენებით, ჯანმრთელობის დაზღვევის სახელმწიფო პროგრამის ფარგლებში არსებული ვალდებულებების უგულვებელყოფისა და მატერიალური გამორჩენის მიღების მიზნით, არ დაარიგეს სოციალურად დაუცველი ფენებისთვის განკუთვნილი სადაზღვევო პოლისები და შესაბამისად, თავი აარიდეს გასაწევი სამედიცინო დახმარების ხარჯებს, რის შედეგადაც ბიუჯეტიდან გამოყოფილი თანხიდან მიითვისეს 5 მილიონზე მეტი", - განმარტავენ პროკურატურაში.
ასევე, გამოძიებით დადგენილია, რომ "ალფას" სახელმწიფო პროგრამების შეწყიდვებისა და მართვის სამსახურის უფროსმა გიორგი ამბროლიანმა და სახელმწიფო პროგრამების მენეჯერმა გივი წულეიმანმა საგამოძიებო სამსახურის მიერ ამ ფაქტთან დაკავშირებით დაკითხულ თანამშრომლებმზე მოახდინეს ზეგავლენა და ისინი აუძულეს "არ მიეწოდებინათ გამოძიებისთვის ინფორმაცია პოლისების დაგვიანებით მიწოდების თაობაზე".
დაკავებულების წინააღმდეგ სისხლის სამართლის საქმე რამდენიმე მუხლითაა აღძრული. მათ საბუთების გაყალბება, ბიუჯეტის განსაკურებით დიდი ოდენობის თანმების მითვისება და გაფლანგვა და სამსახურებრივი უფლებამოსილების ბოროტად გამოყენება ბრალდებათ.
ამ წუთებში დაკავებულები წინასწარი დაკავების იზოლატორში არიან გადაყვანილები.
აღსანიშნავია, რომ საქმეზე გამოძიება კონტროლის პალატის დასკვნის შემდეგ დაიწყო. როგორც ცნობილია, ლევან ბეჟაშვილის უწყების დასკვნაში ნათქვამი იყო, რომ ჯანმრთელობის დაზღვევის სახელმწიფო პროგრამის ფარგლებში სახელმწიფოს მიერ გამოყოფილი 284 მლნ. ლარიდან სადაზღვევო კომპანიებმა მოსახლეობის მომსახურებაზე მხოლოდ 40% დახარჯეს.
"თანხა დაზღვეულთა მხოლოდ მეხუთედს მოხმარდა", - ნათქვამია დასკვნაში.
ამავე კვლევის შედეგების მიხედვით, თავად კომპანიების მოგების მარჟამ 60%-ს გადააჭარბა, "მაშინ როდესაც სადაზღვევო ბიზნესის მომგებიანობის საერთაშორისო პრაქტიკის მსგავსად კერძო დაზღვევაში მოგების მარჟა 4%-ია".
"სახელმწიფოს, სამედიცინო პერსონალისა და პროგრამით მოსარგებლეთა ინტერესების უგულებელყოფის ხარჯზე სადაზღვევო კომპანიებმა მიიღეს 170 მლნ. ლარის შემოსავალი. ამდენად, დაზღვევის სექტორი ხასიათდება მომეტებული რისკებითა და ნაკლოვანებებით: სახელმწიფო მკაცრი რეგულირების არარსებობა; სადაზღვევო კომპანიების არაკეთილსინდისიერი ქმედება; სამედიცინო მომსახურების ხელოვნურად შეზღუდული ხელმისაწვდომობა; პროგრამით მოსარგებლეთა არასაკმარისი ინფორმირება; პროგრამით მოსარგებლე პირთა მონაცემთა ბაზის ცდომილება", - აღნიშნულია კონტროლის პალატის აუდიტის დასკვნაში.
