სისტემაში გასატარებელ რეფორმებზე დღეს იმსჯელეს მთავრობის სხდომაზე. სხდომაზე გადაწყდა, რომ უწყების რეორგანიზაცია 1-ელ მარტამდე უნდა დასრულდეს და განახლებულმა სამსახურებმა უნდა დაიწყონ ფუნქციონირება.

თუმცა, თავად სატრანსპორტო ადმინისტრაციაში განმარტავენ, რომ შესაძლოა რეორგანიზაციის პროცესი 1-ელ მარტამდე ვერ მოესწროს.

რეორგანიზაციის გეგმის მიხედვით კი "ერთიანი სატრანსპორტო ადმინისტრაცია" სახმელეთო, საჰაერო და საზღვაო დეპარტამენტებად დაიშლება, რომელიც ეკონომიკისა და მდგრადი განვითარების სამინისტროს დაექვემდებარება.

შეგახსენებთ, "ერთიანი სატრანსპორტო ადმინისტრაციის" დაშლის შესახებ ინფორმაცია 22 ნოემბერს თავად ეკონომიკისა და მდგრადი განვითარების მინისტრმა ვერა ქობალიამ გაახმაურა.

"ამ სამსახურის დაშლის აუცილებლობა გამოიწვია იმან, რომ უნდა გადავიდეთ საერთაშორისო სტანდარტებზე. აუცილებელია, სამსახურში ავიყვანოთ ახალი კადრები, რომელთაც აქვთ ევროკავშირთან ურთიერთობის გამოცდილება. მე ვთხოვ ყველა დაინტერესებულ ადამიანს, რომელსაც შესაბამისი გამოცდილება აქვს, სამინისტროში დაგვიკავშირდნენ", - განაცხადა ვერა ქობალიამ.

ერთიან სატრანსპორტო ადმინისტრაციაში საჰაერო, სახმელეთო და საზღვაო ადმინისტრაციების გაერთიანება 2005 წელს მოხდა. მაშინ მთავრობის არგუმენტი იყო ის, რომ გაერთიანებული უწყება უფრო კარგად მოახდენდა ცალკეულ სფეროებზე ოპერირებას. დღეს კი მთავრობა აცხადებს, დაშლილ უწყებებში უფრო კარგად მოხდება ამა თუ იმ სფეროს მართვა და დარგის გაუმჯობესება.

ერთიანი სატრანსპორტო ადმინისტრაცია თავდაპირველად ეკონომიკური განვითარების სამინისტროს ექვემდებარებოდა, შემდეგ ის რეგიონალური განვითარებისა და ინფრასტრუქტურის სამინისტროში გადავიდა.
მას შემდეგ, რაც ეკონომიკის სამინისტრომ რეფორმა განიცადა და ეკონომიკისა და მდგრადი განვითარების სამინისტროდ გადაკეთდა, ერთიანი სატრანპორტო ადმინისტრაცია კვლავ ეკონომიკის სამინისტროს დაექვემდებარა.