2013 წელის ბოლომდე მთავრობა ქვეყნის ძირითად ნაწილს 24 საათიან წყალმომარაგებას ჰპირდება. სწორედ ამ მიმართულებით დაიხარჯება "აზიის განვითარების ბანკის" მიერ გამოყოფილი 500 მლნ. დოლარი.
რეგიონალური განვითარებისა და ინფრასტრუქტურის მინისტრის რამაზ ნიკოლაიშვილის განმარტებით, სამინისტრო ცალკეული ქალაქების წყალმომარაგების გაუმჯობესებაზე ინტენსიურად მუშაობს.
"წყალმომარაგების პროექტები უკვე დასრულებულია ანაკლიაში, მესტიაში, მარნეულში, ფოთში - ეს არის გეგმა, როგორ უნდა შეიცვალოს წყლის მომარაგების საკითხი და გადავიდეთ 24 საათიან წყალმომარაგების სისტემაზე. პროექტირება სხვა ქალაქებშიც მიდის და მომდევნო 3 წლის განმავლობაში ეს საკითხები მთლიანად იქნება მოგვარებული", - განაცხადა ნიკოლაიშვილმა.
შეგახსენებთ, დღეს მთავრობის სხდომაზე ცნობილი გახდა, რომ აზიის განვითარების ბანკის საქართველოში 500 მილიონი დოლარის ღირებულების პროექტის განხორციელება იწყებს.
აღნიშნული თანხა ქვეყნის მასშტაბით 10 დიდი ქალაქის წყალმომარაგებისა და საკანალიზაციო სისტემების რეაბილიტაცია-მშენებლობისათვის დაიხარჯება.