აზიის განვითარების ბანკის დახმარებით ქვეყანაში 500 მილიონი დოლარის ღირებულების პროექტის განხორციელება იწყება.
როგორც დღეს მთავრობის სხდომაზე პრემიერ-მინსტრმა ნიკა გილაურმა განაცხადა, აზიის განვითარების ბანკთან ფაქტობრივად დასრულებულია მოლაპარაკებები და ბანკი საქართველოს 500 მილიონი დოლარის პაკეტს გმოუყოფს. აღნიშნული თანხა კი ქვეყნის მასშტაბით ქალაქებისა და დაბების წყალმომარაგებისა და საკანალიზაციო სისტემების რეაბილიტაცია-მშენებლობისათვის დაიხარჯება.
"გასულ წლებში საერთაშორისო საფინანსო ინსტიტუტებიდან - მსოფლიო ბანკიდან და გერმანიის რეკონსტრუქციის ბანკიდან ინვესტიციები ძირითადად ინფრასტრუქტურის მშენებლობაში განხორციელდა. საუბარია გზებზე და გადამცემ ხაზებზე. თუმცა ახლა უკვე ვასრულებთ მოლაპარაკებას აზიის განვითარების ბანკთან წყალმომარაგების სისტემების რეაბილიტაციაზე", - განაცხადა ნიკა გილაურმა.
რეგიონალური განვითარებისა და ინფრასტრუქტურის მინისტრი რამაზ ნიკოლაიშვილის განცხადებით, ქვეყნის მასშტაბით 10 დიდი ქალაქის წყალმომარაგებისა და საკანალიზაციო სისტემების სურლი რეაბილიტაცია განხორციელდება და პროექტი 2,5 წელიწადში დასრულდება.
"პროექტირება რამდენიმე ქალაქში გერმანულმა კომპანიამ უკვე დაასრულა. ახლა ვაცხადებთ ტენდერებს და რამდენიმე თვეში სარეაბილიტაციო სამუშაოები დაიწყება. პროექტი 2,5 წელში უნდა დასრულდეს, რომლის ფარგლებშიც 100 დიდ ქალაქში წყალ-საკანალიზაციო სისტემების სრული რებაილიტაცია მოხდება", - განაცხადა რამაზ ნიკოლაიშვილმა.
მინისტრის თქმით, ამ დროისთვის უკვე დასრულებულია ბაკურიანის წყალ-საკანალიზაციო სისტემების რეაბილიტაცია, იმავდროულად აშენდა წყლის გამწმენდი ნაგებობები. მინისტრი აცხადებს, რომ ანალოგიური პროექტის განხორციელება იგეგმება სხვა ქალაქებშიც და წყალ-საკანალიზაციო სისტემებთან ერთად წყლის გამწმენდი ნაგებობებიც აშენდება.
შეგახსენებთ რომ წყალ-საკანალიზაციო სისტემების რეაბილიტაცია უკვე განხორციელდა ფოთში, ბათუმში, ქობულეთში, ქუთაისში, ბორჯომში და ბაკურიანში.