თბილისის მერიის ქონების მართვის სააგენტოს გადაწყვეტილებით, მერიის კონტრაქტორ 500-მდე პირსა და კომპანიას წლების განმავლობაში დაგროვილი საურავი ჩამოეწერა.
შესაბამისი კანონი, რომლის მიხედვითაც, წლების განმავლობაში დაგროვილი დავალიანების ანულირება მოხდება, მიმდინარე წლის 1-ელი იანვრიდან ამოქმედდა. საუბარია სულ 1 500 000 ლარის დავალიანების ჩამოწერაზე.
"ამ გადაწყვეტილებით კიდევ ერთხელ გამოვხატეთ მხარდაჭერა ბიზნესსექტორის მიმართ, რაც დამატებითი სამუშაო ადგილების შექმნასა და არსებულის შენარჩუნებას შეუწყობს ხელს", - აცხადებს ქონების მართვის სააგენტოს ხელმძღვანელი ვალერიან გვათუა.
ოფიციალური ინფორმაციით, მერიის ქონების იჯარით აღების შემთხვევაში კონტრაქტორი ვალდებული იყო, ყოველ ექვს თვეში ერთხელ მერიისთვის შესაბამისი სამუშაოების შესახებ ინფორმაცია მიეწოდებინა, წინააღმდეგ შემთხვევაში კი საურავი ეკისრებოდა.
