ბათუმში მიკროავტობუსების რაოდენობა მცირდება, რაც მათ ტექნიკურ გაუმართაობას უკავშირდება. სპეციალური პროექტი ქალაქის მერიამ უკვე შეიმუშავა. დღეისათვის, ქალაქის მასშტაბით 722 მიკროავტობუსი მოძრაობს, საიდანაც 371 ერთეული ტექნიკური გაუმართაობის გამო ხაზიდან ამოღებას ექვემდებარება.
ბათუმის მერიის გადაწყვეტილებით, 16 და მეტი წლის მიკროავტობუსი
მოთხოვნილ პარამეტრებს ვეღარ აკმაყოფილებს. მერიაში განმარტავენ, რომ არსებული ავტოპარკიდან სტანდატებს მხოლოდ 351 ერთეული მიკროავტობუსი აკმაყოფილებს.
მერიის ინფორმაციით, სამარშრუტო ხაზზე ყოველდღიურად აუცილებელი მიკროავტობუსების რაოდენობა 283 ერთეულს შეადგენს და რაოდენობა სამარშრუტო ხაზის სიგრძის და დროის ინტერვალის მიხედვითა გაანგარიშებული.
კვირაში ორი დასვენების და რეზერვის გათვალისწინებით მიკროავტობუსების საჭირო მაქსიმალური რაოდენობა 447 ერთეულს შეადგენს.
იმავდროულად, დატვირთული სამუშაო რეჟიმიდან გამომდინარე, დასაშვებია ერთ მიკროავტობუსზე ორი ან მეტი მძღოლის დასაქმება.
ბათუმის მერიაში განმარტავენ, რომ მიკროავტობუსებისა და ავტობუსების სამარშრუტო ხაზების ნუმერაციის გამიჯვნა უკვე განხორციელდა და ბათუმის მაშტაბით ავტობუსებისათვის სამარშრუტო ხაზების ნუმერაცია 1-დან 19-ის ჩათვლით იქნება. ამჟამად ქალაქის მაშტაბით მოქმედებს 11 სამარშრუტო ხაზი 1-დან 11-ის ჩათვლით. ხოლო მიკროავტობუსების სამარშრუტო ხაზების ნუმერაცია იქნება 20-დან ზევით.
მერის მიერ უკვე შემუშავდა საქალაქო სამგზავრო გადაზიდვების ნებართვის გაცემის წესი და კონკურსის ჩატარების პირობები, რომლის მიხედვითაც კონკურსი 2011 წლის 26 იანვრიდან 31 იანვრის ჩათვლით ჩატარდება, ხოლო საკონკურსო განაცხადების მიღება მიმდინარე წლის 20 იანვრის დილის 10 საათიდან 21 იანვრის საღამოს 18 საათამდე იწარმოებს.
ხელშეკრულება კონკურსში გამარჯვებულ გადამზიდავებთან გაფორმდება 2011 წლის 1 თებერვლიდან, ხელშეკრულების ვადა განისაზღვრება ერთი წლით.