რამდენიმე დღეში "სურსათის ეროვნული სააგენტო" სურსათის მწარმოებელი კომპანიების კონტროლს დაიწყებს.
საწყის ეტაპზე სააგენტო ხორც-პროდუქტებისა და რძის-პროდუქტების მწარმოებელ კომპანიებს შეამოწმებს.
სააგენტოს უფროსის დავით კობერიძის განმარტებით, 2011 წლის განმავლობაში 200 კომპანია შემოწმდება.
"სურსათის უვნებლობისა და ხარისხის შესახებ" კანონში შეტანილი ცვლილებები დღეს სასტუმრო "შერატონ მეტეხში" შეკრებილ ბიზნესმენებს სოფლის მეურნეობის მინისტრმა და "სურსათის ეროვნული სააგენტოს" ხელმძღვანელმა გააცნეს.
"2011 წლის 3 იანვრიდან ძალაში შევიდა სახელმწიფო კონტროლი სურსათის მწარმოებელი კომპანიებისათვის, რაც იმას ნიშნავს რომ მაღალი რისკის საწარმოები ინსპექტირებას დაექვემდებარებიან. შესაბამისად ვცდილობთ, რომ ჩვენი საქმიანობა ბიზნესთან მიმართებაში პარტნიორულ საფუძვლებზე იყოს დამყარებული. "სურსათის ეროვნული სააგენტო" გეგმიურ ინსპექტირებას იანვრის ბოლოდან დაიწყებს"- აცხადებს დავით კობერიძე.
მისივე ინფორმაციით, 2010 წელს სამსახურის მიერ 51 ექსპორტიორი კომპანია შემოწმდა, ხოლო 2011 წელს 200 სურსათის მწარმოებელი კომპანია შემოწმდება.
სოფლის მეურნეობის მინისტრი ბაკურ კვეზერელი ამბობს, რომ სურსათის მწარმოებელ კომპანიებს საწარმოს კანონით გაწერილ სტანდარტებთან შესაბამისობაში მოსაყვანად ერთი წელი აქვთ.
"ჩვენი მიზანია, რომ მეწარმეებს "სურსათის უვნებლობისა და ხარისხის შესახებ" კანონში შეტანილი ცვლილებები გავაცნოთ. ამ ეტაპზე საწარმოების საქმიანობის შეზღუდა არ მოხდება, პირიქით ჩვენ მათ კანონით მოთხოვნილი სტანდარტების დახვეწაშიც დავეხმარებით. ამისათვის კი კომპანიებს 1 წლიანი ვადა აქვთ. მეწარმე სუბიექტებთან თანამშრომლობას პარტნიორულ ფორმატში გავაგრძელებთ"- აცხადებს ბაკურ კვეზერელი.
დღესვე ცნობილი ხდება, რომ "სურსათის ეროვნულ სააგენტოს" დამოუკიდებლად, კომპანიაში შესვლისა და მონიტორინგის უფლება არ აქვს.
"სურსათის ეროვნული სააგენტოს" უფროსი აცხადებს, რომ სამსახურს გეგმიური შემოწმების გარდა არაგეგმიური შემოწმების უფლებაც აქვს, თუმცა არაგეგმიური შემოწმების განსახორციელებლად სამსახურს სასამართლოს ნებართვა ესაჭიროება.
"გეგმიურთან ერთად არსებობს ასევე არაგეგმიური ინსპექტირება, როდესაც სასამართლოს საფუძველზე საშუალება გვაქვს ესა თუ ის საწარმო შევამოწმოთ"- აცხადებს კობერიძე.
"სურსათის ეროვნული სააგენტო" სურსათის მწარმოებელ საწარმოში გამოვლენილი დარღვევის შემდეგ, სააგენტო საწარმოს რეკომენდაციას და პრობლემების აღმოსაფხვრელად გარკვეულ ვადას აძლევს, თუმცა თუ გაწერილ ვადაში კომპანიამ პრობლემა არ მოაგვარა მაშინ მეწარმე ჯარიმდება.