საქართველოში ჩეხეთის სრულუფლებიანი ელჩი ივან იესტრჟაბი თუშეთში იმყოფებოდა.
როგორც კახეთის საინფორმაციო ცენტრს ახმეტის მუნიციპალიტეტის გამგებელმა კობა მაისურაძემ განუცხადა, ელჩმა თუშეთში დამონტაჟებული მზის ბატარეები დაათვალიერა და თუშეთის მაცხოვრებლებს შეხვდა.
შეგახსენებთ, რომ თუშეთის სოფლები 20 წელია ელექტროენერგიის გარეშეა დარჩენილი. 2010 წელს ჩეხეთის განვითარების სააგენტომ 250 000 ლარით დააფინანსა პროექტი, რომლის ფარგლებშიც თუშეთში მცხოვრები ოჯახების ელექტროენერგიით უზრუნველსაყოფად მზის სისტემის ბატარეები დამონტაჟდა. პროექტი ზამთრის დადგომამდე უნდა დასრულებულიყო, თუმცა ბატარეების დამონტაჟების პროცესი შეფერხდა. ამ დროისთვის სულ 62 ცალი ბატარეაა დამონტაჟებული, რომლითაც თუშეთში მუდმივად მაცხოვრებლები და მწყემსები სარგებლობენ. პროექტის თანახმად, ბატარეები უნდა დაუმონტაჟონ საოჯახო სასტუმროებსაც.
