განათლებისა და მეცნიერების სამინისტროს ინფორმაციით, მეორე ტურში, რომელიც საქართველოს 65 ქალაქისა და რაიონული ცენტრის 91 სკოლაში მიმდინარეობს, 85 ათასამდე მოსწავლე გადავიდა. ეროვნული სასწავლო ოლიმპიადის მეორე ტურის მიმდინარეობას დღეს მინისტრის მოადგილე კოკა სეფერთელაძე თბილისის 161-ე საჯარო სკოლაში გაეცნო.
ოლიმპიადის მეორე ტური 9 იანვარს ინფორმატიკის ოლიმპიადით დაიწყო. 11 იანვარს მეორე ტური ჩატარდა უცხო ენასა და მათემატიკაში. დღეს, 12 იანვარს - ისტორიასა და ფიზიკაში, 13 იანვარს ქართულ ენასა და ქიმიაში, 14 იანვარს კი გეოგრაფიასა და ბიოლოგიაში გაიმართება.
საქართველოს განათლებისა და მეცნიერების სამინისტროს ინიციატივით, რამოდენიმე წელია სხვადასხვა საგანში შემოქმედებითი ოლიმპიადა ტარდება.
"ოლიმპიადის მიზანია გამორჩეული ცოდნითა და ნიჭით დაჯილდოებული მოსწავლეების გამოვლენა, მათი წახალისება და სასწავლო პროცესის სტიმულირება. ჰუმანიტარულ საგნებში მოსწავლეებს მოეთხოვებათ როგორც ფაქტობრივი ცოდნა, ასევე, წყაროს ინტერპრეტაცია, საკუთარი აზრის გამოხატვა, არგუმენტირებულად დასაბუთება და კრიტიკული აზროვნება. ტექნიკურ საგნებში კი, მიღებული ცოდნის გამოყენება როგორც თეორიულ, ასევე პრაქტიკული შინაარსის ამოცანების ამოსახსნელად", - აცხადებენ სამინისტროში.