2010 წელს, 2009 წელთან შედარებით, საქართველოში უცხო ქვეყნის მოქალაქეთა დაქორწინების მსურველთა რიცხვი ორჯერ გაიზარდა. თუ 2009 წლის განმავლობაში საქართველოში ოცმა უცხოელმა წყვილმა იქორწინა, 2010 წელს სამოქალაქო რეესტრის სააგენტოს ქორწინების სახლებში ხელი 57-მა წყვილმა მოაწერა.
აღსანიშნავია, რომ უცხოელთა შორის ყველაზე მეტი პოპულარობით სიღნაღის ქორწინების სახლი სარგებლობს. სიღნაღში ქორწინების სახლი 24 საათიან რეჟიმში მუშაობს. სამოქალაქო რეესტრის სააგენტოს ცნობით, აქ ქორწინების არა ერთი ცერემონიალი ჩატარებულა 03:00 და გამთენიისას - 05:00 საათზეც.
იუსტიციის სამინისტროს სამოქალაქო რეესტრის სააგენტოში გამარტივებულია ქორწინების რეგისტრაციისთვის აუცილებელი პროცედურები, როგორც საქართველოს, ასევე უცხო ქვეყნის მოქალაქეებისთვის.
„საქართველოში დაქორწინების მსურველ უცხოელებს აღარ სჭირდებათ სამოქალაქო რეესტრის სპეციალური ნებართვა, ცნობა ქორწინების დამაბრკოლებელი გარემოებების არ არსებობის შესახებ და პასპორტის თარგმანი. ეს კი თავის მხრივ ზოგავს მექორწინეთა ხარჯებსა და დროს", - განაცხადეს სამოქალაქო რეესტრის სააგენტოში.
