როგორც "ჯი-ეიჩ-ენს" პარლამენტის პრესსამსახურიდან აცნობეს, იერუსალიმის ქართულ მონასტერში ამჟამად რამდენიმე ქართველი მონაზონი მოღვაწეობს. მონასტერს ფინანსურ დახმარებას საქართველოს პარლამენტის თავმჯდომარე დავით ბაქრაძე, თავმჯდომარის მოადგილე რუსუდან კერვალიშვილი, პარლამენტის რამდენიმე წევრი და 17 მსხვილი კომპანია გაუწევენ.

თანხის ნაწილი (1000 აშშ დოლარი) უკვე გადაირიცხა. დამატებით 800 აშშ დოლარი 14 იანვრისთვის გადაირიცხება. საქველმოქმედო აქცია გაგრძელდება და დედათა მონასტრის ანგარიშზე თანხა ყოველთვიურად ჩაირიცხება.

ქველმოქმედებაში მონაწილეობა ევროპის რამდენიმე საქველმოქმედო ორგანიზაციამაც მოისურვა. იერუსალიმის "ქართულ სახლს" მძიმე მატერიალური მდგომარეობის გამო დახურვა ემუქრება.

იერუსალიმში "ქართული კოლონიის" შესახებ მე-17 საუკუნის ისტორიულ წყაროებშია საუბარი (ძველი ქართული მწერლობის კრებული-II). შემორჩენილია მონაზონ მართას წერილი დასავლეთ საქართველოს კათალიკოსის, გრიგორისადმი, რომელშიც დაწვრილებით არის აღწერილი "ქართული სახლი" და იქ მოღვაწე მონაზვნების ცხოვრება.

იერუსალიმის "ქართული სახლის" დახმარების მსურველებს თანხის ჩარიცხვა შეუძლიათ შემდეგ საბანკო ანგარიშზე:

IBAN - il59 0107 8400 0000 2696 198

Bic: - LUMIILITXXX

784 GILO BRANCH - COMMERCIAL CENTER 800

ZIP CODE: 93840