აშშ საქართველოს ფინანსურად ისევ დაეხმარება. ამჯერადაც თანხის გამოყოფა პროგრამის "ათასწლეულის გამოწვევა საქართველოში" მეორე ეტაპის ფარგლებშია დაგეგმილი.
როგორც საქართველოს პრემიერ-მინისტრის პრესსამსახურის უფროსმა ნიკო მჭედლიშვილმა დღეს გამათულ ბრიფინგზე განაცხადა, თანხის გამოყოფა გუშინ, "ათასწლეულის გამოწვევის კორპორაციის" ბორდის სხდომაზე გადაწყდა.
"ბორდის სხდომაზე გადაწყდა, რომ ფინანსურ დახმარებას მეორე კომპაქტის ფარგლებში ორი ქვეყანა _ საქართველო და განა მიიღებენ. გამოყოფილი თანხის ოდენობა მოგვიანებით დაზუსტდება. საქართველოსა და ამერიკის მთავრობებს შორის შეთანხმდება ის პროექტებიც, რომლებიც გამოყოფილი თანხით დაფინანსდება",' - განაცხადა მჭედლიშვილმა.
მისივე განმარტებით, თანხის ნაწილი, სავარაუდოდ, ბათუმში ახალი ტექნოლოგიური უნივერსიტეტის მშენებლობას და რამდენიმე ინფრატსრუქტურული პროექტის განხორციელებას მოხმარდება.
"უხეში გათვლებით, ბათუმში ახალი ტექნოლოგიური უნივერსიტეტის მშენებლობა 40-50 მილიონი ლარი ჯდება. ასევე უნდა აღვნიშნო, რომ მშენებლობის დასრულების შემდეგ დაგეგმილია მისი აშშ-ს რომელიმე უნივერსიტეტის მმართველობაში გადაცემა. შესაბამისად, ეს უნივერსიტეტი ამერიკის სახელმწიფო დიპლომს გასცემს," - განმარტა მჭედლიშვილმა.
აღსანიშნავია, რომ თანხა აშშ-ს საჩუქარია და ქვეყანას მისი დაბრუნების ვალდებულება არ ექნება.
მჭედლიშვილმა პრემიერ-მინისტრის სახელით შეერთებული შტატების მთავრობას მადლობაც გადაუხადა.
შეგახსენებთ, რომ რამდნიმე წლის წინ პროგრამის "ათასწლეულის გამოწვევა საქართველოში" პირველი კომპაქტის ფარგლებში საქართველომ აშშ-სგან 400 მილიონ დოლარამდე მიიღო. თანხა მსხვილ ინფრასრუქტურულ პროექტებსა და აგროსექტორის განვითარებაზე გაიხარჯა. მაშინ საქართველოს გარდა აშშ-მ კიდევ 15 ქვეყანა დააფინანსა.
