ხვალ, 6 იანვარს, სახელმწიფო შესყიდვების სააგენტოს დავების განხილვის საბჭოში პირველად საჩივრის განხილვა შედგება. სააგენტოში შექმნილ დავების განხილვის საბჭოში საჩივარი შპს "სტრადამ" 2010 წლის 30 დეკემბერს წარადგინა.
საჩივარი ეხება თვითმმართველი ქალაქ ბათუმის მერიის მიერ 2010 წლის 18 დეკემბერს გამოცხადებულ გამარტივებულ ელექტრონულ (სატენდერო განცხადება № SPA100000191) ტენდერს. საჩივრის განხილვის პროცესი განხორციელდება ღია და გამჭვირვალე გარემოში და ნებისმიერ დაინტერესებულ პირს ექნება შესაძლებლობა თვალყური ადევნოს საჩივრის განხილვის მიმდინარეობას და გაეცნოს დავების განხილვის საბჭოს გადაწყვეტილებას.
შეგახსენებთ, რომ დავების განხილვის საბჭო 2010 წლის 30 ნოემბერს შეიქმნა და მის შემადგენლობაში შედიან პარიტეტის პრინციპის დაცვით არჩეული არასამთავრობო სექტორის (საქართველოს ახალგაზრდა იურისტთა ასოციაციის, საქართველოს ბიზნესმენთა ასოციაციისა და ნავთობპროდუქტების იმპორტიორთა და რეალიზატორთა ასოციაციის) და სააგენტოს წარმომადგენლები.
