ფინანსთა სამინისტროს ინფორმაციით, სამინისტროსთან არსებული დავების განხილვის საბჭო მის მიერ მიღებული მნიშვნელოვანი გადაწყვეტილებების საზოგადოებისთვის გაცნობას განაგრძობს.
მიმდინარე კვირის განმავლობაში საბჭომ 38 საჩივარი განიხილა, რომელთაგან შეირჩა ქსნის მინის ქარხნის საჩივარი ფართო საზოგადოებისთვის გასაცნობად.

მინის კომპანიის საჩივარი რამდენიმე ეპიზოდისგან შედგებოდა, ხოლო სადავო თანხა 2,2 მილიონ ლარს აღემატებოდა.
საბჭომ დააკმაყოფილა ის ეპიზოდები, რომელიც ეხებოდა მომჩივნისთვის მისი დამფუძნებლის მიერ მიწოდებულ ტექნიკურ მომსახურებას, ასევე მინის კომპანიის მიერ თურქეთში გაყიდული ბოთლებისა და სამშენებლო მასალის დაბეგვრის საკითხს.

დარჩენილი სადავო საკითხებიდან დარიცხვის ერთ-ერთ საფუძველს მომჩივანი თავადვე დაეთანხმა, ხოლო ორი ნაწილი საბჭომ არ დააკმაყოფილა დაუსაბუთებლობის მოტივით.
აღსანიშნავია, რომ დარიცხული გადასახადებისა და სანქციის უმეტესი ნაწილი სწორედ დაკმაყოფილებულ ეპიზოდებზე მოდიოდა და ამდენად, გადაწყვეტილებით გადამხდელს მხოლოდ უმნიშვნელო თანხა დარჩა გადასახდელი.