ხვალ, 18 დეკემბერს, 13:00 საათზე, შემოსავლების სამსახურის უფროსი გიორგი ცხაკაია ექსპერტებს შეხვდება და შემოსავლების სამსახურის "ახალ კურსს" გააცნობს. ექსპერტებისა და შემოსავლების უფროსის შეხვედრა ლილოში განთავსებულ გაფრმების ეკონომიკურ ზონაში შედგება. ექსპერტები გაეცნობიან ახალ მომსახურებებს, როგორიცაა: ელექტრონული მომსახურებების ვებ-პორტალი www.RS.ge, პირადი საგადასახადო აგენტი, წინასწარი გადაწყვეტილება, დღგ-ს დაბეგვრის სპეციალური წესი და სხვა. ასევე, დაათვალიერებენ „გეზს" და გაეცნობიან ტვირთის გაფორმების გამარტივებულ წესებს.
შეგახსენებთ, რომ 3 დეკემბერს საქართველოს პრეზიდენტმა მიხეილ სააკაშვილმა ლილოში ოფიციალურად გახსნა ახალი საერთაშორისო სტანდარტების შესაბამისი გაფორმების ეკონომიკური ზონა. გახსნას დაესწრნენ პრემიერ-მინისტრი ნიკოლოზ გილაური, ფინანსთა მინისტრი კახა ბაინდურაშვილი, შემოსავლების სამსახურის უფროსი გიორგი ცხაკაია.
გაფორმების ეკონომიკური ზონა (გეზი) ეს არის საქართველოში უპრეცედენტო სიდიდის, 12 ჰექტარზე გაშენებული კეთილმოწყობილი ტერიტორია სრული კომფორტით. სპეციალურად დაგეგმარებული ავტოსადგომი გათვლილია 400 სატვირთო ავტომანქანაზე. შესაძლებელია ერთდროულიად ნებისმიერი რაოდენობის იმპორტიორის მომსახურება კვირაში შვიდი დღე, 24 საათის განმავლობაში. ტვირთის გაფორმებისას, იმპორტიორს აღარ უწევს ძვირადღირებული ბროკერისა და დეკლარატის დაქირავება.
შესაძლებელია იმპორტიორმა დაისვენოს იმ დროს, სანამ მისი ტვირთი გადის გაფორმების პროცედურას. იმპორტიორის სრული ინფორმირება ხდება ერთ ფანჯარასთან, რითაც იგი ზოგავს დროსა და ენერგიას. იმპორტიორს შესაძლებლობა აქვს ისარგებლოს ექსპერტისა და ტექნიკური პერსონალის მომსახურებით. "გეზში" ტვირთის გაფორმების საფასურის გადახდა შესაძლებელია 5-დღიანი გადავადებით. ტვირთის გაფორმების სრული პროცედურა აქ რამდენიმე წუთში სრულდება.
გაფორმების ეკონომიკური ზონის შექმნა ახალი ეკონომიკური კურსის ნაწილია, რომელიც ითვალისწინებს სამართლიანი, მარტივი და სანდო საგადასახადო სისტემის შეთავაზებას ბიზნესისთვის.