საქართველოს ტურისტული პოტენციალის საერთაშორისო რეკლამირება მომავალ წელსაც გაგრძელდება.
ამ მიზნითYტურიზმის დეპარტამენტს 2011 წლის სახელმწიფო ბიუჯეტის პროექტით დამატებითი თანხები გამოეყოფა.
როგორც ფინანსთა მინისტრმა კახა ბაინდურაშვილმა პარლამენტის დღევანდელ რიგგარეშე სესიაზე, აღნიშნული პროექტის წარდგენისას განაცხადა, ტურიზმის დეპარტამენტი ტურპაკეტებს შექმნის, ტურისტულ სააგენტოებს ტურისტების მოზიდვაში, თავად ტურისტებს კი ყველა საჭირო ინფორმაციით უზრუნველყოფაში დაეხმარება.
ამასთან, ბაინდურაშვილის განმარტებით, საქართველოს ტურისტული პოტენციალის საერთაშორისო რეკლამირებაში აქტიურად იქნება ჩართული საინვესტიციო სააგეტოც, რომელიც წლის დასაწყისიდანვე უცხოეთის სხვადასხვა ქვეყნებში შესაბამის სემინარებს გამართავს და აღნიშნულთან დაკავშირებით უცხოელი ინვესტორების საინფორმაციო უზრუნველყოფას მოახდენს.
"ასევე ეკონომიკის სამინისტრო აპირებს დაამუშავოს სექტორული სტრატეგიები. აქამდე თახების მოზიდვა ძირითადად პრივატიზაციის კუთხით ხდებოდა, მაგრამ ვინაიდან საპრივატიზაციო ობიექტები თანდათან კლებულობს, მნიშვნელოვანია, რომ გადავიდეთ განვითარების უფრო მაღალ ეტაპზე. სახელმწიფოს უნდა ჰქონდეს ეკონომიკის ძირითადი მიმართულებების განვითარების ძალზედ დეტალური სტრატეგიები და არა მხოლოდ სტრატეგიები, არამედ სამოქმედო გეგმებიც, რომელსაც მომავალ წელს, ეკონომიკის სამინისტრო ბიზნესმენებს აუცილებლად გააცნობს", - დასძინა ფინანსთა მინისტრმა.