ეკონომიკისა და მდგრადი განვითარების მინისტრთან ერთად ანტიკრიზისული საბჭო 2011 წლის გაზაფხულზე შეიკრიბება, _ ამის შესახებ განცხადება ეკონომიკისა და მდგრადი განვითარების მინისტრმა ვერა ქობალიამ ანტიკრიზისული საბჭოს დასრულების შემდეგ განაცხადა.
შეხვედრაზე ეკონომიკისა და მდგრადი განვითარების მინისტრთან ერთად საბჭოს წევრებმა საქართველოს მდგრადი განვითარების ეროვნული სტრატეგიის შემუშავებაზე და შემდგომ ნაბიჯებზე იმსჯელეს.
ვერა ქობალია ანტიკრიზისული საბჭოს წევრებთან შეხვედრას დადებითად აფასებს.
"გვქონდა ძალიან საინტერესო შეხვედრა, რომელზედაც განვიხილეთ რამდენიმე საკითხი, მათ შორის მდგრადი განვითარების სტრატეგია 2011 წლისთვის. ანტიკრიზისულ საბჭოსაც ჰქონდა თავისი მოსაზრებები და შეხედულებები, რომელიც წერილობით ფორმაში მოგვაწოდეს. შეხვედრაზე ვისაუბრეთ ასევე იმაზეც, თუ რა შეიძლება გაკეთდეს ერთობლივი მუშაობით. ყველას უნდა, რომ საქართველო ეკონომიკურად და სოციალურად მდგრადად განვითარდეს",- აცხადებს ეკონომიკისა და მდგრადი განვითარების მინისტრი.
იურიდიულ საკითხთა კომიტეტის თავმჯდომარის პავლე კუბლაშვილის განმარტებით კი მინისტრისა და საბჭოს წევრების შეხვედრაზე მიმდინარე საკითხებთან ერთად დიდი ყურადღება ბოლო პერიოდში გატარებულ რეფორმებსაც დაეთმო.
"შეხვედრაზე იყო ასევე საუბარი სამოქალაქო ავიაციაზე და ყველა სხვა სეგმენტზე. საინტერესო ინფორმაციები მივიღეთ ეკონომიკისა და მდგრადი განვითარების მინისტრისგან. მომავალ წელს კიდევ გვექნება ანალოგიური შეხვერდა და შემდგომი სამოქმედო გეგმებზე ვიმსჯელებთ",- აცხადებს პავლე კუბლაშვილი.
ანტიკრიზისული საბჭოს თავმჯდომარის გია თორთლაძის განმარტებით, საბჭოს ეკონომიკისა და მდგრადი განვითარების მინისტრთან შეხვედრის დროს ყურადღება გაამახვილა ასევე სასოფლო-სამეურნეო მიწის პრივატიზაციის საკითხებზც.
"შეხვედრაზე ვისაუბრეთ პრივატიზაციის საკითხებზე, როგორიც არის სამეურნეო მიწები. ასევე ვისაუბრეთ ტურიზმისა და ინფრასტრუქტურის განვითარებაზე და ამ მისამართით ძალიან ბევრი კითხვები იყო დასმული საბჭოს მხრიდან. მინისტრს მდგრადი განვითარების ეროვნულ სტრატეგიასთან დაკავშირებით ჩვენი ხედვა გავაცანით"- აღნიშნა გია თორთლაძემ.