ერთ თვეში ფრანგული კომპანია "CITELUM" აჭარის მთავრობას ბათუმის გარე განათების კონცეპციასა და გენგეგმას წარუდგენს.
აჭარის ფინანსთა და ეკონომიკის სამინისტროს ინფორმაციით, ფრანგული კომპანია ერთიან ქსელს ქმნის, რომელიც ერთი სამართავი პუნქტიდან კომპიუტერიზებული სისტემით იმართება, ხოლო ყველა სანათურის ბოძზე მონტაჟდება სპეციალური პულტი, რომელიც საშუალებას იძლევა ავტომატურ რეჟიმში იმართოს ყველა ლამპიონი ცალ-ცალკე. ეს კი ელექტროენერგიის 25-30 %-მდე დაზოგვას იწვევს.
გარეგანათების კომპანია "CITELUM" მსოფლიოში ცნობილი და დიდი გამოცდილების ფირმაა.
ამჟამად ის მსოფლიოს 34 ქვეყანაში ფუნქციონირებს, 20 ქვეყნის დედაქალაქის 500 -მდე ქუჩის განათებას მართავს. ეიფელის კოშკი, ბრანდერბურგის კარიბჭე, შანხაის ბიზნეს ცენტრი, ვენეცია, ბარსელონა, მეხიკო, რიო-დეჟანეირო ეს ის სამაგალითი ჩამონათვალია, რომელსაც ფირმა ემსახურება.