რუსეთმა და ევროკავშირმა სავიზო საკითხებთან მიმართებაში ურთიერთგაგებას მიაღწიეს და ამიერიდან ყველა ღონეს იხმარენ იმისათვის, რომ "გაიხსნას გზა" მოლაპარაკებათა დასაწყებად, რომელთა საბოლოო შედეგი უვიზო მიმოსვლის შესახებ ორმხრივი შეთანხმების გაფორმებაა. ეს განცხადება დღეს ბრიუსელში რუსეთ-ევროკავშირის სამიტის დასრულების შემდეგ გამართულ პრესკონფერენციაზე ევროპული კომისიის პრეზიდენტმა ჟოზე მანუელ ბაროზუმ გააკეთა.
"სავიზო საკითხს ძალიან დიდი მნიშვნელობა აქვს როგორც რუსეთისთვის ისე ევროკავშირისთვის. მე ვიცი რომ ეს ძალიან მნიშვნელოვანია რუსეთის მოქალაქეებისთვის და მიმაჩნია, რომ ჩვენმა მინისტრებმა იპოვეს გზა თუ როგორ წაიწიონ წინ. ახლა ვიწყებთ ერთობლივად გადასადგმელი ნაბიჯების შემუშავებას, რომელთა გადადგმის შემდეგაც გაიხსნება გზა რუსეთსა და ევროკავშირს შორის უვიზო რეჟიმის შეთანხმების მიღწევისათვის მოლაპარაკებების დასაწყებად", _ განაცხადა ბაროზუმ.